នៅពេលគេរំឭកពីឈ្មោះខេត្តមណ្ឌលគិរី គេប្រាកដជានឹកស្រមៃពីទិដ្ឋភាពនៃតំបន់ប្រជុំភ្នំ ដែលមានចំនួនរហូតដល់រាប់ពាន់រាប់ម៉ឺនភ្នំ និងព្រៃព្រឹក្សាដ៏ស្តុកស្តម្ភលាតសន្ធឹងពេញទូទាំងខេត្ត។ ដោយសារពាក្យមណ្ឌលគិរីនេះហើយ ប្រជាពលរដ្ឋរស់នៅតំបន់ទំនាបកណ្តាលនៃប្រទេសកម្ពុជាយល់ថា ក្នុងខេត្តមួយនេះមិនមានទន្លេ ឬកោះទេ តែជាក់ស្តែងខេត្តមណ្ឌលគិរី មានស្រុកមួយឈ្មោះស្រុកកោះញែក មិនត្រឹមតែមានទន្លេ និងកោះទេ ថែមទាំងមានតំបន់ឆ្នេរខ្សាច់ទន្លេដ៏ស្រស់ស្អាតកំពុងទាក់ទាញអ្នកទេសចរ។ «កោះម្យើល» ស្ថិតនៅតាមដងទន្លេស្រែពក ក្នុងភូមិសាស្ដ្រកោះម្យើលលើ ឃុំណងឃីលឹក ស្រុកកោះញែក ខេត្តមណ្ឌលគិរី មានចម្ងាយពីទីរួមខេត្ត១៣០គីឡូម៉ែត្រ និងមានចម្ងាយពីទីរួមស្រុកកោះញែក៤៧គីឡូម៉ែត្រ។ លក្ខណៈពិសេសនៅទីនោះគឺមានឆ្នេរខ្សាច់ទឹកទន្លេរាក់ៗ ទឹកជោរ និងមានម្លប់ដើមជ្រៃលើមាត់ច្រាំងទន្លេ មានរុក្ខជាតិសម្រាប់អង្គុយលំហែ និងចតរថយន្តបែបធម្មជាតិ៕ ប្រភពរូបភាពពី៖ SOK BOREY - បូរី