(ភ្នំពេញ)៖ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ឱ្យដឹងថា ក្នុងរយៈពេល ៣ថ្ងៃនៃពិធីបុណ្យភ្ជុំបិណ្ឌ គិតចាប់ពីថ្ងៃទី ២១-២២-២៣ ខែកញ្ញា ឆ្នាំ២០២៥នេះ ផ្លូវល្បឿនលឿនមានរថយន្តធ្វើដំណើរសរុប ៦២ ២៩១គ្រឿង កើនឡើងចំនួន ៣ ៨០២គ្រឿង ស្មើនឹង ៦,៥% បេីធៀបនឹងឆ្នាំ២០២៤ គ្រោះថ្នាក់ចរាចរណ៍មាន ៥ករណី ថយចុះ ១ករណី ។ ថ្លែងប្រាប់បណ្តាញព័ត័មាន Fresh News នាថ្ងៃទី២៥ ខែកញ្ញា ឆ្នាំ២០២៥នេះ លោក ផន រឹម បានបញ្ជាក់ឱ្យដឹងថា ទិន្នន័យចរាចរណ៍លើផ្លូវល្បឿនលឿនភ្នំពេញ-ក្រុងព្រះសីហនុ ថ្ងៃឈប់សម្រាកបុណ្យភ្ជុំបិណ្ឌ ៣ថ្ងៃ មានដូចជា ថ្ងៃទី១ ចំនួនចរាចរណ៍ មានចំនួន ២០ ១១៦ គ្រឿង កើនឡើងចំនួន ២ ៦៨១គ្រឿង ស្មើនឹង ១៥,៣៧%។ ថ្ងៃទី២ ចំនួនចរាចរណ៍ មានចំនួន ១៨ ៣៦៦ គ្រឿង កើនឡើងចំនួន ៣៦០ គ្រឿង ស្មើនឹង ២%។ ថ្ងៃទី៣ ចំនួនចរាចរណ៍ មានចំនួន ២៣ ៨០៩ គ្រឿង កើនឡើងចំនួន ៧៦១ គ្រឿង ស្មើនឹង ៣,៣0%។ សរុប៣ថ្ងៃ ចំនួនចរាចរណ៍ សរុប ៦២ ២៩១ គ្រឿង កើនឡើងចំនួន ៣ ៨០២ គ្រឿង ស្មើនឹង ៦,៥%។ ដោយឡែកសម្រាប់ទិន្នន័យគ្រោះថ្នាក់ចរាចរណ៍ ថ្ងៃទី១ មាន ១ករណី ដូចគ្នានឹងឆ្នាំ២០២៤។ ថ្ងៃទី២ មានចំនួន ២ករណី ថយចុះ ១ករណីធៀបឆ្នាំ២០២៤ ។ ថ្ងៃទី៣ មានចំនួន ២ករណី ដូចគ្នានឹងឆ្នាំ២០២៤។ សរុប៣ថ្ងៃ មានចំនួន ៥ករណី ថយចុះ ១ករណី(មិនមានអ្នករបួស និងអ្នកស្លាប់)៕