ភ្នំពេញ៖ ការចរាចរណ៍រថយន្តដឹកទំនិញធុនធ្ងន់លើផ្លូវជាតិលេខ ៧៦ ចន្លោះពីបង្គោលគីឡូម៉ែត្រលេខ ២៧០ ដល់ ២៧៣ ក្នុង ស្រុកលំផាត់ ខេត្តរតនគិរី ត្រូវផ្អាកបណ្ដោះអាសន្ន ដោយសារជំនន់ទឹកភ្លៀង។ នេះបើតាមការជូនដំណឹងរបស់មន្ទីរសាធារណការ និងដឹកជញ្ជូនខេត្តរតនគិរី នៅថ្ងៃទី២៥ ខែកញ្ញា។មន្ទីរសាធារណការ និងដឹកជញ្ជូនខេត្តរតនគិរី បានបញ្ជាក់ក្នុងសេចក្ដីជូនដំណឹងថា ដោយសារមានភ្លៀងធ្លាក់ជារៀងរាល់ថ្ងៃ ធ្វើឱ្យផ្លូវថ្នល់ ស្ពានមិនអាចទ្រាំទ្រនឹងទម្ងន់រថយន្តដឹកទំនិញធុនធ្ងន់ ស្របពេលជំនន់បានជន់លិចផ្លូវដោយកន្លែង ដែលនាំឱ្យពិបាកធ្វើចរាចរ។ ចំពោះមុខ មន្ទីរសាធារណការ និងដឹកជញ្ជូនខេត្តរតនគិរី បានសម្រេចបិទចរាចរណ៍ទាំងស្រុង ចំពោះរថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវជាតិលេខ ៧៦ ចន្លោះបង្គោល គីឡូម៉ែត្រលេខ ២៧០ ដល់ បង្គោលគីឡូម៉ែត្រលេខ២៧៣ រហូតដល់មានការជូនដំណឹងជាថ្មី ដើម្បីថែរក្សា ផ្លូវថ្នល់ ស្ពាន កុំឱ្យបាក់ស្រុត និងធានាដល់ការធ្វើចរាចរណ៍របស់ពលរដ្ឋប្រកបដោយសុវត្ថិភាព។ មន្ទីរសាធារណការ និងដឹកជញ្ជូនខេត្តរតនគិរី សង្ឃឹមថា សាធារណជន ជាពិសេសម្ចាស់រថយន្តដឹកទំនិញធុនធ្ងន់គ្រប់ប្រភេទ នឹងចូលរួមអនុវត្តតាមសេចក្តីជូនដំណឹងខាងលើនេះ ដោយស្មារតីយោគយល់ ដើម្បីរួមចំណែកថែរក្សា ផ្លូវថ្នល់ ស្ពាន ប្រើប្រាស់បានយូរអង្វែង៕