ភ្នំពេញ ៖ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន បានណែនាំដល់មន្រ្តីនៅក្នុងស្ថានីយជញ្ជីង ត្រូវពង្រឹងនិងត្រូវរៀបចំសកម្មភាពចុះត្រួតពិនិត្យយានយន្តដឹកជញ្ជូនលើសទម្ងន់កំណត់នៅក្នុងដែនសមត្ថកិច្ចរបស់ខ្លួន ឱ្យបានម៉ឺងម៉ាត់បំផុត។ ក្នុងឱកាសដឹកនាំកិច្ចប្រជុំ ដើម្បីពង្រឹងការអនុវត្តការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ កាលពីថ្ងៃទី១៨ ខែកញ្ញា ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានកោតសរសើរ និងបានផ្តល់អនុសាសន៍ណែនាំដល់មន្រ្តីនៅក្នុងស្ថានីយត្រូវពង្រឹងសាមគ្គីភាពក្នុងស្ថានីយ គោរពវិន័យ ត្រូវពង្រឹង និងត្រូវរៀបចំសកម្មភាពចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅក្នុងដែនសមត្ថកិច្ចរបស់ខ្លួន ហើយត្រូវរាយការណ៍មកថ្នាក់ដឹកនាំ ដើម្បីចាត់វិធានការបន្ទាន់ និងត្រូវសហការឱ្យបានល្អជាមួយក្រុមការងារក្រសួង និងគ្រប់ភាគីពាក់ព័ន្ធទាំងអស់។ ទន្ទឹមនឹងការអនុវត្តវិធានការច្បាប់ ក៏ត្រូវចុះអប់រំផ្សព្វផ្សាយដល់អាជីវករ និងម្ចាស់អាជីវកម្មនានាពាក់ព័ន្ធនឹងការដឹកជញ្ជូន ឱ្យមានការយល់ដឹងអំពីច្បាប់ និងលិខិតបទដ្ឋានគតិយុត្តនានាកាន់តែទូលំទូលាយបន្ថែមទៀត។ សូមជម្រាបថា កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យលើការងារដែលកំពុងអនុវត្តតាមរយៈការពង្រឹងតួនាទី ភារកិច្ច និងការទទួលខុសត្រូវឱ្យបានត្រឹមត្រូវ ព្រមទាំងស្វែងរកដំណោះស្រាយរួមគ្នា ពីបញ្ហាប្រឈមនានា ជាមួយវិស័យឯកជន សំដៅធ្វើយ៉ាងណាឱ្យការអនុវត្តការងារ និងត្រួតពិនិត្យយានយន្តនៅតាមស្ថានីយជញ្ជីងនីមួយៗប្រព្រឹត្តទៅដោយអនុលោមតាមច្បាប់ និងលិខិតបទដ្ឋានគតិយុត្តដោយម៉ឺងម៉ាត់៕