ទឹកធ្លាក់លែងអង លែងឃឹន សម្ងំលាក់ខ្លួនក្នុងព្រៃនៃតំបន់អូររាំង ចម្ងាយប្រមាណ ២០គីឡូម៉ែត្រ ពីក្រុងសែនមនោរម្យនៃខេត្តមណ្ឌលគិរី។ ទឹកធ្លាក់មួយកន្លែងនេះ ជាទីកម្សាន្តដែលមានសម្រស់ស្រស់ស្អាតប្លែក អមដោយធម្មជាតិខៀវស្រងាត់ និងបរិយាកាសត្រជាក់ល្អ។ នៅទីនោះ យើងអាចសម្រាកទទួលទានអាហារថ្ងៃត្រង់ លេងទឹកធ្លាក់ និងថតរូបស្អាតជាមួយទេសភាពស្រស់ត្រកាលផងដែរ។ ទឹកធ្លាក់ដែលយើងនឹងឃើញដំបូងពេលទៅដល់ទីនោះ គឺធ្លាក់លែងអង ដែលនៅខាងលើ។ ប្រសិនបើយើងកាត់ផ្លូវព្រៃប្រមាណ 100ម៉ែត្រ យើងនឹងអាចចុះទៅដល់ទឹកធ្លាក់ដំណាក់ខាងក្រោមគឺ លែងឃឹន។ ទឹកធ្លាក់ទាំង២ដំណាក់មានលក្ខណៈខុសពីគ្នា ដោយលែងអងមានសភាពទាប និងអាចហែលលេងបានស្រួល និងលែងឃឹន មានកម្ពស់ខ្ពស់ ហើយទឹកធ្លាក់ខ្លាំងជាង៕ ប្រភពពី៖ នាម - Neam