អភិបាលខេត្តកណ្ដាល នៅថ្ងៃចន្ទនេះ នៅតែបង្ហាញក្ដីបារម្ភចំពោះបញ្ហាគ្រោះថ្នាក់ចរាចរណ៍ បើទោះជាក្នុងខេត្តមួយនេះ មានអត្រាអ្នកស្លាប់ដោយសារគ្រោះថ្នាក់ចរាចរណ៍ថយចុះយ៉ាងណាក្ដី។ លោកអភិបាលខេត្តបានណែនាំឱ្យអាជ្ញាធរពាក់ព័ន្ធត្រូវចុះអប់រំ និងផ្សព្វផ្សាយដល់ប្រជាពលរដ្ឋ ឱ្យបានយល់ដឹងពីបញ្ហាគ្រោះថ្នាក់ចរាចរណ៍ ដើម្បីរួមគ្នាបង្ការ ទប់ស្កាត់ និងកាត់បន្ថយការស្លាប់ និងរបួសដោយគ្រោះថ្នាក់ចរាចរណ៍។អភិបាលខេត្តកណ្ដាល លោក គួច ចំរើន បានលើកឡើងដូច្នេះនៅក្នុងឱកាសអញ្ជើញជាអធិបតីពិធីប្រកាសចូលកាន់មុខតំណែងអភិបាលរងក្រុងតាខ្មៅ នាព្រឹកថ្ងៃទី១៥ ខែកញ្ញា ឆ្នាំ២០២៥ នៅសាលាក្រុងតាខ្មៅ។ បើតាមលោក គួច ចំរើន គិតដល់ពេលនេះ ប្រជាពលរដ្ឋដែលបានស្លាប់ដោយគ្រោះថ្នាក់ចរាចរណ៍សម្រាប់ខេត្តកណ្ដាលមានចំនួន៦៤នាក់ បើប្រៀបធៀបទៅនឹងឆ្នាំ២០២៤ មានប្រជាពលរដ្ឋបានស្លាប់ដោយគ្រោះថ្នាក់ចរាចរណ៍ប្រមាណជាង ១០០នាក់។អត្រាចុះថយក្នុងការស្លាប់ដោយគ្រោះថ្នាក់ចរាចរណ៍នេះ លោកអភិបាលខេត្តគូសបញ្ជាក់ថា ដោយមានការចូលរួមអនុវត្តបានយ៉ាងខ្ជាប់ខ្ជួនរបស់កងកម្លាំងមានសមត្ថកិច្ច អាជ្ញាធរពាក់ព័ន្ធ និងពិសេសប្រជាពលរដ្ឋបានចូលរួមគោរព និងអនុវត្តច្បាប់ចរាចរណ៍បានយ៉ាងល្អប្រសើរ ដែលធ្វើឱ្យចំនួនអ្នកស្លាប់មានការថយចុះ។ បើទោះជាមានការថយចុះយ៉ាងក៏ពិតមែន តែលោកអភិបាលខេត្ត ថា គ្រោះថ្នាក់ចរាចរណ៍នៅតែបានឆក់យកអាយុជីវិតរបស់ប្រជាពលរដ្ឋក្នុងខេត្តកណ្ដាល បើធៀបជាមួយសង្គ្រាមរវាងកម្ពុជា និងថៃ ពេលកន្លងមក មានការស្លាប់ច្រើនជាងសង្គ្រាមទៀត។ ក្នុងន័យនេះ លោក គួច ចំរើន បានណែនាំឱ្យកងកម្លាំង អាជ្ញាធរពាក់ព័ន្ធ ត្រូវបន្តខិតខំយកចិត្តទុកដាក់ក្នុងការអប់រំ និងផ្សព្វផ្សាយឱ្យបានទូលំទូលាយដល់ប្រជាពលរដ្ឋជាប្រចាំ ដើម្បីរូមគ្នាបង្ការ ទប់ស្កាត់ បញ្ជៀសការស្លាប់ និងរបួសដោយគ្រោះថ្នាក់ចរាចរណ៍ឱ្យបាននៅទាបបំផុត តាមដែលអាចធ្វើទៅបាន៕