ក្រុមការងាររាជរដ្ឋាភិបាលចុះមូលដ្ឋាខេត្តមណ្ឌលគិរី ចែកចង្ក្រានបង្កើនថាមពលព្រៃមាន់ ជូនដល់ប្រជាពលរដ្ឋចំនួន ១ ៦២៧ គ្រួសារ នៅក្រុងសែនមនោរម្យ ខេត្តមណ្ឌលគិរី ៖ ដើម្បីចូលរួមលើកស្ទួយជីវភាពប្រជាពលរដ្ឋដែលរស់នៅតំបន់ភូមិភាគឦសាន ឯកឧត្តម ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ ចំណុះក្រសួងសាធាណការ និងដឹកជញ្ជូន និងជាសមាជិកក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតីភាព ក្នុងពិធីចែកចង្ក្រានបង្កើនថាមពលព្រៃមាន់ ជូនដល់ប្រជាពលរដ្ឋចំនួន ១ ៦២៧គ្រួសារ ដោយក្នុងមួយគ្រួសារទទួលបានចង្ក្រានមួយ។ ក្នុងពិធីនេះមានការអញ្ជើញចូលរួមពីសំណាក់ឯកឧត្តម សាខុម ប៉ូរិន អគ្គលេខាធិការរង និងជាប្រធានបណ្តាញសង្គមស៊ីវិលកម្ពុជា (CCN) និងជាតំណាងក្រុមហ៊ុន Guangzhou Iceberg Environmental Consulting Service Co.,Ltd លោក ចាយ ថៃ ប្រធានក្រុមប្រឹក្សាក្រុងសែនមនោរម្យ លោក ហៀក សុផាន អភិបាលក្រុងសែនមនោរម្យ លោក-លោកស្រីចៅសង្កាត់ រួមមាន៖ សង្កាត់រមនា សង្កាត់សុខដុម និងសង្កាត់មនោរម្យ ។ ពិធីនេះបានធ្វើឡើងនៅបរិវេណសាលាក្រុងសែនមនោរម្យ នាព្រឹកថ្ងៃទី៣១ ខែសីហា ឆ្នាំ២០២៥ ក្រោមបរិយាកាសដ៏សប្បាយរីករាយពីបងប្អូនប្រជាពលរដ្ឋ៕