ក្រុមការងារបច្ចេកទេសអន្តរក្រសួង នៃក្រសួងសាធារណការ និងដឹកជញ្ជូន និង ក្រសួងសេដ្ឋកិច្ច និងហិរញ្ញវត្ថុ បានបន្តបេសកកម្មជុំទី២ ចុះពិនិត្យស្ថានីយប្រព្រឹត្តកម្មទឹកកខ្វក់ និងហេដ្ឋារចនាសម្ព័ន្ធពាក់ព័ន្ធ ស្ថិតនៅតាមបណ្តាខេត្តជាប់មាត់សមុទ្រកម្ពុជា នាថ្ងៃទី២៥ ដល់ថ្ងៃទី២៦ ខែសីហា ឆ្នាំ២០២៥ ឯកឧត្តម ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការនិងដឹកជញ្ជូន សហការរួមគ្នាជាមួយ ឯកឧត្តម ឱម ម៉ាក់ធារិទ្ធ អគ្គនាយក នៃអគ្គនាយកដ្ឋានភាពជាដៃគូរវាងរដ្ឋ និង ឯកជន (អ.រ.ជ.) បានបន្តបេសកកម្មជុំទី២ ដឹកនាំមន្រ្ដីបច្ចេកទេសនៃក្រសួងទាំងពីរ ចុះបេសកកម្មពិនិត្យប្រព័ន្ធទឹកកខ្វក់ រួមមានស្ថានីយប្រព្រឹត្តកម្មទឹកកខ្វក់ ស្ថានីយបូមដែលកំពុងតែដំណើរការ និងគ្រប់គ្រងដោយអង្គភាពប្រព័ន្ធចម្រោះទឹកកខ្វក់នៃមន្ទីរសាធារណការ និងដឹកជញ្ជូនខេត្ត តាមបណ្តាខេត្តជាប់មាត់សមុទ្រកម្ពុជារួមមាន ខេត្តកែប ខេត្តកំពត និងខេត្តព្រះសីហនុ។ បេសសកម្មនេះមានគោលបំណងចុះពិនិត្យ ប្រមូលព័ត៍មាន និងទិន្នន័យដើម្បីឈានទៅដល់ការវាយតម្លៃ និងជ្រើសរើសទីតាំងសក្តានុពលសម្រាប់អនុវត្តគម្រោងសាកល្បងប្រតិបត្តិការ និងថែទាំប្រព័ន្ធទឹកកខ្វក់ តាមយន្តការភាពជាដៃគូរវាងរដ្ឋ និង ឯកជន។ សូមបញ្ជាក់ផងដែរថា បេសសកម្មនេះក៏មានការចូលរួមពី៖ (១) តំណាងដៃគូអភិវឌ្ឍ រួមមាន៖ ធនាគារអភិវឌ្ឍន៍អាស៊ី (២) រដ្ឋបាលមូលដ្ឋាន (៣) មន្ទីរសាធារណការនិងដឹកជញ្ជូនខេត្តជុំវិញខេត្តជាប់សមុទ្រ និង (៤) ស្ថាប័នពាក់ព័ន្ធ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok