វេទិកាសាធារណៈថ្នាក់ជាតិនៅស្រុកកែវសីមា ដើម្បីឆ្លុះបញ្ចាំងលើការគាំទ្រយុទ្ធសាស្រ្តបញ្ចកោណ ដំណាក់កាលទី១ នីតិកាលទី៧ នៃរដ្ឋសភា មណ្ឌលគិរី៖ នាព្រឹកថ្ងៃចន្ទ ទី២៥ ខែសីហា ឆ្នាំ២០២៥ ឯកឧត្តម ទិន ពន្លក រដ្ឋលេខាធិការ ក្រសួងបរិស្ថាន ជាប្រធានក្រុមការងារចុះមូលដ្ឋានស្រុកកែវសីមា បានអញ្ជើញជាអធិបតីក្នុងវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា។ វេទិកាសាធារណៈនេះ មានការអញ្ជើញចូលរួមពី ឯកឧត្តម សួន សុខឃីម រដ្ឋលេខាធិការ ក្រសួងផែនការ និងជាអនុប្រធានក្រុមការងារចុះមូលដ្ឋានស្រុកកែវសីមា លោក សាន់ ដារឹទ្ធ អភិបាលរងខេត្តមណ្ឌលគិរី លោក ឡេង វណ្ណសាក់ អគ្គនាយករង ក្រសួងផែនការ និងជាសមាជិកក្រុមការងាររាជរដ្ឋាភិបាលចុះមូលដ្ឋានស្រុកកែវសីមា លោក សាន គឹមអ៊ាប អភិបាលស្រុកកែវសីមា អភិបាលរងស្រុកកែវសីមា កងកម្លាំងប្រដាប់អាវុធទាំងបីប្រភេទ លោក លោកស្រីប្រធាន-អនុប្រធានមន្ទីរពាក់ព័ន្ធ មន្រ្ដីជំនាញ អាជ្ញាធរភូមិ ឃុំ និងប្រជាពលរដ្ឋចូលរួមជាច្រើនរូបផងដែរ ដោយប្រព្រឹត្តទៅនៅភូមិអូរណា ឃុំស្រែខ្ទុម ស្រុកកែវសីមា ខេត្តមណ្ឌលគិរី។ ក្រោមការដឹកនាំ និងសម្របសម្រួលពីឯកឧត្តមអនុប្រធាន វេទិកានេះបានជជែកពិភាក្សាយ៉ាងផលផុស លើការឆ្លើយតប និងស្វែងរកដំណោះស្រាយជូនប្រជាពលរដ្ឋមូលដ្ឋាន ក៏ដូចជាផ្សព្វផ្សាយគោលនយោបាយ និងសមិទ្ធផលសំខាន់ៗរបស់រាជរដ្ឋាភិបាល ដែលសម្រេចបាន និងកំពុងអនុវត្ត ដើម្បីឱ្យប្រជាពលរដ្ឋបានជ្រាបច្បាស់ ដោយក្នុងវេទិកានេះដែរ ប្រជាពលរដ្ឋបានលើកឡើងពីសំណើ សំណូមពរមួយចំនួន រួមមាន៖ ហេដ្ឋារចនាសម្ព័ន្ធផ្លូវថ្នល់ តម្លៃកសិផល បណ្ដាញអគ្គិសនី ប្រព័ន្ធទឹកស្អាត និងសន្តិសុខសាធារណៈ ជាដើម៕