ដើម្បីសម្រួលដល់ការធ្វើដំណើរដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ ក្រសួងសាធារណការ និងដឹកជញ្ជូន សម្រេចបើកចរាចរណ៍ឆ្លងកាត់លើស្ពានមិត្តភាពកម្ពុជា-ចិន មេគង្គក្រចេះ រយៈពេល៣ថ្ងៃ ចាប់ពីថ្ងៃទី២៧-២៩ សីហា។ បើតាមក្រសួងសាធារណការ ការចរាចរណ៍នេះ អនុញ្ញាតតែម៉ូតូ កង់ និងថ្មើរជើងប៉ុណ្ណោះ។នៅថ្ងៃទី២៨-២៩ សីហាខាងមុខ ជាថ្ងៃរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥។ សម្រាប់បេក្ខជនប្រឡងនៅខេត្តក្រចេះ អាចធ្វើដំណើរឆ្លងកាត់ស្ពានមិត្តភាពកម្ពុជា-ចិន មេគង្គក្រចេះ ទៅកាន់មណ្ឌលប្រឡង។ បើតាមក្រសួងសាធារណការ នៅថ្ងៃទី២៧ ខែសីហា នឹងបើកពីម៉ោង១-៥ល្ងាច។ រីឯថ្ងៃទី២៨ ខែសីហា នឹងបើកពីម៉ោង៥៖៣០នាទីព្រឹក ដល់៨ព្រឹក និងពីម៉ោង៥-៦៖៣០ល្ងាច។ សម្រាប់ថ្ងៃទី២៩ ខែសីហាវិញ នឹងបើកពីម៉ោង៥៖៣០នាទីព្រឹក ដល់៨ព្រឹក និងពីម៉ោង៤៖៣០-៥៖៣០ល្ងាច។ សូមបញ្ជាក់ថា ស្ពានមិត្តភាពកម្ពុជា-ចិន មេគង្គក្រចេះ នឹងត្រូវដាក់ឱ្យដំណើរបណ្តោះអាសន្នសម្រាប់យានយន្តធុនតូច នាអំឡុងរដូវកាលបុណ្យភ្ជុំបិណ្ឌ ក្នុងខែកញ្ញា៕