កិច្ចប្រជុំគណៈកម្មការដើម្បីពិភាក្សាលើការរៀបចំវេទិការួមរវាងរដ្ឋ និងវិស័យឯកជនក្នុងតំបន់អាស៊ី លើកទី១៦ នៅព្រះរាជាណាចក្រកម្ពុជា រាជធានីភ្នំពេញ៖ នាថ្ងៃសុក្រ ទី១៥ ខែសីហា ឆ្នាំ២០២៥ ឯកឧត្តម ពៅ ម៉ាលី រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំលើកទី១ នៃគណៈកម្មការរៀបចំវេទិការួមរវាងរដ្ឋ និងវិស័យឯកជនក្នុងតំបន់អាស៊ី លើកទី១៦ នៅព្រះរាជាណាចក្រកម្ពុជា ដែលគ្រោងនឹងប្រព្រឹត្តទៅនៅខែវិច្ឆិកា ខាងមុខនេះ ដោយមាន១៦ប្រទេសចូលរួម និងអ្នកចូលរួមសរុបប្រមាណជា ១៥០នាក់ ដែលមកពីស្ថាប័នរដ្ឋាភិបាល សមាគម និងឧស្សាហកម្មយានយន្តធំៗ នៅលើសកលលោក។ កិច្ចប្រជុំនេះក៏មានការអញ្ជើញចូលរួមពីឯកឧត្តម អនុរដ្ឋលេខាធិការ ឯកឧត្តមអគ្គនាយក លោកនាយករងខុទ្ទកាល័យ លោកអគ្គនាយករង លោកប្រធាននាយកដ្ឋាន និងមន្ត្រីជំនាញផ្សេងទៀត។ កិច្ចប្រជុំនេះផ្តោតសំខាន់លើការប្រកាសពីសមាសភាពរបស់សមាជិកនៃគណៈកម្មការរៀបចំវេទិការួមរវាងរដ្ឋ និងវិស័យឯកជនក្នុងតំបន់ អាស៊ី លើកទី១៦ នៅព្រះរាជាណាចក្រកម្ពុជា និងការបែងចែកតួនាទីទៅតាមក្រុមការងារនីមួយៗ នៃគណៈកម្មការនេះ ដើម្បីធ្វើយ៉ាងណាអោយឱ្យការរៀបចំនេះប្រកបទៅដោយរលូន និងលទ្ធផលផ្លែផ្កា៕