កម្ពុជាធ្វើជាម្ចាស់ផ្ទះនៃកិច្ចប្រជុំក្រុមការងារដឹកជញ្ជូនផ្លូវគោកអាស៊ាន លើកទី៣៤ និងកិច្ចប្រជុំពាក់ព័ន្ធផ្សេងទៀត នៅរាជធានីភ្នំពេញ ពីថ្ងៃទី១១ -១៥ ខែសីហា ឆ្នាំ២០២៥ ភ្នំពេញ ៖ កិច្ចប្រជុំអាស៊ានរយៈពេល ៥ថ្ងៃ ចាប់ពីថ្ងៃទី១១ -១៥ ខែសីហា ឆ្នាំ២០២៥ លោក ច័ន្ទធី សុជីវ៉ា អគ្គនាយករង នៃអគ្គនាយកដ្ឋានសាធារណការ និងជាប្រធានក្រុមការងារដឹកជញ្ជូនផ្លូវគោកកម្ពុជា បានដឹកនាំកិច្ចប្រជុំក្រុមការងារដឹកជញ្ជូនផ្លូវគោកអាស៊ានលើកទី៣៤ (34rd LTWG) នៅរាជធានីភ្នំពេញ ដែលកម្ពុជាធ្វើជាម្ចាស់ផ្ទះជាថ្មីម្ដងទៀត។ កិច្ចប្រជុំនេះ មានការចូលរួមពីគណៈប្រតិភូនៃបណ្តាប្រទេសជាសមាជិកអាស៊ាន រួមមានមកពីប្រទេសព្រុយណេ កម្ពុជា ឥណ្ឌូនេស៊ី(តាមប្រព័ន្ធវីដេអូ) ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ(តាមប្រព័ន្ធវីដេអូ) វៀតណាម និងដៃគូសន្ទនាពាក់ព័ន្ធ UNESCAP, ជប៉ុន, សាធារណរដ្ឋកូរ៉េ, U.S.DOT, UNEP-ICCT, ARCEO, AFEVA ព្រមទាំងមានការចូលរួមពីគណៈប្រតិភូទីម័រខាងកើត ក្នុងនាមជាអ្នកអង្កេតការ ផងដែរ។ កិច្ចប្រជុំក្រុមការងារដឹកជញ្ជូនផ្លូវគោកអាស៊ានលើកទី៣៤ ខាងលើនេះ បានចែកជា ៣ វគ្គសំខាន់ៗក្នុងការពិភាក្សា ពាក់ព័ន្ធមានដូចជា៖ (១) ប្រជុំអនុក្រុមការងារផ្លូវហាយវ៉េអាស៊ានលើកទី២៣ (23rd AHSWG) ដែលកម្ពុជាជាសហប្រធាន, (២) ប្រជុំអនុក្រុមការងារសុវត្ថិភាពចរាចរណ៍ផ្លូវគោកពហុវិស័យអាស៊ានលើកទី១៦ (16th MRSSWG) កម្ពុជាជាប្រធាន, និង (៣) ប្រជុំអនុក្រុមការងារផ្លូវដែកអាស៊ានលើកទី៦ (6th ARSWG) កម្ពុជាជាសហប្រធាន។ ជាលទ្ធផល អង្គប្រជុំបានធ្វើការពិនិត្យឡើងវិញចុងក្រោយ (End-Term Review) តាមរយៈការធ្វើបច្ចុប្បន្នភាពវឌ្ឍនភាពលើសកម្មភាពពាក់ព័ន្ធ ដូចមានចែងក្នុងផែនការយុទ្ធសាស្ត្រដឹកជញ្ជូនអាស៊ានឆ្នាំ២០១៦-២០២៥ (KLTSP 2016-2025) សំដៅសម្រេចទៅតាមផែនការដែលបានគ្រោងទុក និងកំពុងរៀបចំផែនការយុទ្ធសាស្ត្រដឹកជញ្ជូនអាស៊ានឆ្នាំ២០២៦-២០៣០ (ATSP 2026-2030) ដើម្បីឆ្លើយតបទៅនឹងការប្ដេជ្ញារបស់ប្រទេសជាសមាជិកអាស៊ានក្នុងការលើកកម្ពស់យ៉ាងសកម្មដល់ការអភិវឌ្ឍផ្នែកដឹកជញ្ជូនផ្លូវគោក និងធ្វើឱ្យប្រសើរឡើងនូវការតភ្ជាប់ ជម្រុញដល់ការធ្វើសមាហរណកម្មក្នុងតំបន់ និងរួមចំណែកដល់ការបង្កើនសមត្ថភាពប្រកួតប្រជែងរបស់អាស៊ាន ក្នុងនាមជាតំបន់មួយដែលចាត់ទុកជាមហាអំណាចសេដ្ឋកិច្ចទី៥ លើសកលលោក៕