វគ្គបណ្តុះបណ្តាល ស្តីពី «ការរៀបចំផែនការរជ្ជទេយ្យបុរេប្រទាន» ជូនដល់មន្ត្រីបង្គោលរបស់អង្គភាពថវិការដ្ឋបាលកណ្តាល ក្រសួងសាធារណការ និងដឹកជញ្ជូន កែប៖ នាថ្ងៃព្រហស្បតិ៍ ទី១៤ ខែសីហា ឆ្នាំ២០២៥ ឯកឧត្តម វ៉ាស៊ឹម សុរិយា អនុរដ្ឋលេខាធិការ តំណាងលោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការនិងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ស្តីពី «ការរៀបចំផែនការរជ្ជទេយ្យបុរេប្រទាន» ជូនដល់មន្ត្រីបង្គោលរបស់អង្គភាពថវិការដ្ឋបាលកណ្តាល ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពី ឯកឧត្តមថ្នាក់ដឹកនាំអង្គភាពថវិកា មន្ត្រីជំនាញគ្រប់គ្រងហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ និងសិក្ខាកាមអញ្ជើញមកពីគ្រប់អង្គភាពថវិការដ្ឋបាលកណ្តាល និងមកពីគ្រប់មន្ទីរសាធារណការនិងដឹកជញ្ជូនរាជធានីខេត្តក្រោមឱវាទក្រសួងសរុបចំនួន ១២៥នាក់។ វគ្គបណ្តុះបណ្តាលនេះត្រូវបានរៀបចំឡើងដោយនាយកដ្ឋានហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ ដោយផ្ដោតលើប្រធានបទ២សំខាន់ៗ រួមមានៈ ១). ការអនុវត្តចំណាយថវិកាចរន្ត និង ២).ការរៀបចំផែនការរជ្ជទេយ្យបុរេប្រទាន ក្នុងគោលបំណង ដើម្បីផ្តល់ជាមូលដ្ឋានសំខាន់ៗដោយផ្តោតទៅលើការគ្រប់គ្រងចំណាយតាមរជ្ជទេយ្យបុរេប្រទាន និងនីតិវិធីចំណាយដែលតម្រូវឱ្យឆ្លងកាត់កិច្ចលទ្ធកម្មសាធារណៈ និងមិនតម្រូវឱ្យឆ្លងកាត់កិច្ចលទ្ធកម្មសាធារណៈ ដល់សិក្ខាកាមឱ្យបានយល់ដឹងកាន់តែស៊ីជម្រៅ និងជាពិសេសសិក្ខាកាមជាមន្ត្រីបង្គោលមកពីអង្គភាពថវិការដ្ឋបាលកណ្តាលក្រសួង ហើយវគ្គបណ្តុះបណ្តាលនេះនឹងផ្តល់ជាពុទ្ធិក្នុងការជួយជ្រោមជ្រែងដល់មន្រ្តីបច្ចេកទេស ដែលទទួលបន្ទុកហិរញ្ញវត្ថុនៅតាមអង្គភាពថវិកាទាំងអស់របស់ក្រសួង។ ការរៀបចំវគ្គបណ្តុះបណ្តាលនេះក៏ជាផ្នែកមួយនៃការអនុវត្តសកម្មភាពនៅក្នុងការងារកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជា ក៏ដូចជាទិសដៅរបស់ក្រសួងក្នុងការពង្រឹងប្រសិទ្ធភាព អនុវត្តការងាររបស់ អង្គភាពថវិការដ្ឋបាលកណ្តាលក្រសួង និងអង្គភាពថវិកាថ្នាក់មូលដ្ឋាន ដោយផ្តោតទៅលើថវិកាសមិទ្ធកម្ម និងការប្រើប្រាស់ថវិកាជាតិប្រកបដោយប្រសិទ្ធភាព៕