ក្រសួងសាធារណការ និងដឹកជញ្ជូន ទទួលនូវអំណោយជាគ្រឿងឧបភោគ បរិភោគពី ភោជនីយដ្ឋានបាយ័ន ដើម្បីចែកជូនដល់វីរកងទ័ពខ្មែរ និងបងប្អូនប្រជាពលរដ្ឋភៀសសឹក ទីស្តីការក្រសួង៖ នាព្រឹកថ្ងៃចន្ទ ទី១១ ខែសីហា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានទទួលនូវអំណោយជាគ្រឿងឧបភោគ បរិភោគ ដែលឧបត្ថម្ភដោយ លោកស្រី ថេ ដាឡែន នាយិកាភោជនីយដ្ឋានបាយ័ន រួមមាន ទឹកសុទ្ធ ១០០កេស ទឹកស៊ីអ៊ីវ ១០០យួរ មីជាតិ ១០០កេស និងទឹកផ្លែឈើ ៥០កេស ដើម្បីចែកជូនបន្តដល់វីរកងទ័ពដ៏អង់អាចក្លាហានរបស់ខ្មែរ និងបងប្អូនប្រជាពលរដ្ឋភៀសសឹក។ សកម្មភាពនេះជាទឹកចិត្តដ៏ធំធេងដែលបានបង្ហាញនូវការគោរពស្រឡាញ់ ផ្តល់កម្លាំងចិត្តដល់វីរភាពកងទ័ពការពារជាតិរបស់យើង គាំទ្រកងទ័ពជួរមុខកម្ពុជាដ៏អង់អាច ក្នុងន័យបង្ហាញពីខឿនការពារជាតិ ជាពិសេសការគិតគូរដល់បងប្អូនប្រជាពលរដ្ឋភៀសសឹក ដែលបាននិងកំពុងជម្លៀសចេញពីផ្ទះសម្បែងមកទីកន្លែងសុវត្ថិភាព។