ផ្លូវជាតិលេខ ៥៨ ជាខ្សែផ្លូវយុទ្ធសាស្ត្រដ៏សំខាន់ ដែលបានសម្ពោធដាក់ឲ្យប្រើប្រាស់កាលពីឆ្នាំ ២០២០។ ផ្លូវនេះមានប្រវែងសរុប ១៧៤,១៦៦ គីឡូម៉ែត្រ ដែលបានចំណាយថវិកាសាងសង់ប្រមាណជាង ១២២លាន ដុល្លារអាមេរិក។ផ្លូវជាតិលេខ ៥៨ ចំណុចចាប់ផ្តើមចេញពីផ្លូវជាតិលេខ៥ ត្រង់គ.ម ៣៩៩+៩០០ ក្រុងប៉ោយប៉ែត ស្ថាបនាប្របតាមជួរភ្នំដងរែកឆ្លងកាត់តំបន់យុទ្ធសាស្រ្តនិងច្រកទ្វារសំខាន់ៗដូចជាច្រកទ្វារអូរបីជាន់ ច្រកបឹងត្រកួន ក្នុងខេត្តបន្ទាយមានជ័យ ច្រកជប់គគីរ ច្រកថ្មដូន ប្រាសាទតាមាន់ តាក្របី រហូតទៅកាន់ផ្លូវជាតិលេខ ៦៨ ត្រង់គ.ម ១០១+៥០០ (ផ្លុង) ឆ្ពោះទៅច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ។តាមរយៈផ្លូវជាតិមួយខ្សែនេះ បានចូលរួមចំណែកយ៉ាងសំខាន់ក្នុងការសម្រួលដល់ការធ្វើដំណើររបស់ប្រជាពលរដ្ឋនិងការដឹកជញ្ជូនផលកសិកម្មរបស់ពលរដ្ឋ និងដូចជារបងខឿនការពារជាតិដែលមិនអាចរំកិលបាន៕