ដោយគិតគូពីសុវត្ថិភាព និងសោភ័ណភាពតាមទីប្រជុំជន ក្រសួងរៀបចំដែនដី នគរូបនីយកម្ម និងសំណង់ និងក្រសួងសាធារណការ និងដឹកជញ្ជូន បានប្រជុំពិភាក្សាគម្រោងកែលម្អ និងលើកកម្ពស់សោភ័ណភាពកំណាត់ផ្លូវជាតិលេខ៤ ដោយជ្រើសរើសទីតាំងទីប្រជុំជន ចំនួន ៣ទីតាំង (ស្ថិតក្នុងភូមិសាស្ត្រ ក្រុងច្បារមន ខេត្តកំពង់ស្ពឺ ទីតាំងរង្វង់មូលវាលរេញ និងផ្សារព្រៃនប់ ស្ថិតក្នុងភូមិសាស្ត្រខេត្តព្រះសីហនុ) ដើម្បីអនុវត្តជាគម្រោងសាកល្បង។ គម្រោងនេះផ្តោតលើ៖(១).ការរៀបចំទីសាធារណៈ និងទីប្រជុំជនក្នុងក្រុងឱ្យមានបរិយាកាសល្អអាចរស់នៅបានសម្រាប់ទាំងអស់គ្នា (២).ឈានទៅកាត់បន្ថយ និង បញ្ជៀសគ្រោះថ្នាក់ចរាចរណ៍ជាយថាហេតុ ផ្តល់សេវាកាន់តែល្អប្រសើរសម្រាប់អ្នករស់នៅ និងឆ្លងកាត់តំបន់ជាប្រចាំ ព្រមទាំង (៣). ផ្តល់នូវហេដ្ឋារចនាសម្ព័ន្ធចាំបាច់សម្រាប់ឱ្យអ្នកទីក្រុងមានភាពងាយស្រួលក្នុងការរស់នៅ។ ក្រុមការងារបច្ចេកទេសរបស់ក្រសួងជំនាញទាំងពីត នឹងចុះទៅទីតាំង ដើម្បីពិនិត្យស្ថានភាពជាក់ស្តែង តាមបទដ្ឋានបច្ចេកទេស។