"ការអនុវត្តកិច្ចការប្រកបដោយប្រសិទ្ធភាព មានសុខភាពល្អ និងមានសុវត្ថិភាពក្នុងការធ្វើដំណើរពេលចុះបំពេញការងារ ត្រូវជៀសឱ្យឆ្ងាយពីគ្រឿងញៀន " ជាមតិលើកឡើង ឯកឧត្តម សេន ស៊ីហ៊ត់ ក្នុងពិធីចុះអប់រំផ្សព្វផ្សាយអំពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១០ ឆ្នាំ២០២៥ និងវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងការចូលរួមគោរពច្បាប់ស្តីពីចរាចរណ៍ផ្លូវគោក នៅមន្ទីរសាធារណការ និងដឹកជញ្ជូនខេត្តកំពត និងខេត្តតាកែវ នៅថ្ងៃទី២២-២៣ ខែកក្កដា ឆ្នាំ២០២៥ ដោយទទួលបានការណែនាំដ៏ខ្ពង់ខ្ពស់ពី ឯកឧត្តម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន ឯកឧត្តម សេន ស៊ីហ៊ត់ រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន បានចុះអប់រំផ្សព្វផ្សាយអំពីវិធីការពារទប់ស្កាត់ការចម្លងមេរោគអេដស៍ និងជំងឺអេដស៍ និងផលប៉ះពាល់បណ្តាលមកពីការប្រើប្រាស់គ្រឿងញៀន និងការចូលរួមគោរពច្បាប់ស្តីពីចរាចរណ៍ផ្លូវគោក ដល់មន្ត្រីរាជការ បុគ្គលិក និងកម្មករ បម្រើការងារនៅមន្ទីរសាធារណការ និងដឹកជញ្ជូនខេត្តកំពត និងខេត្តតាកែវ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ រួមទាំងក្រុមការងារពាក់ព័ន្ធមកពីអង្គភាពក្រោមឱវាទក្រសួង និង ថ្នាក់ដឹកនាំ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តនីមួយៗ បានចូលរួមផងដែរ។ ក្រោមកិច្ចសហការជាមួយអាជ្ញាធរជាតិប្រយុទ្ធនឹងជំងឺអេដស៍ និងអង្គការមូលនិធិថែទាំសុខភាពអ្នកជំងឺអេដស៍ (AHF) ការចុះផ្សព្វផ្សាយនេះ គឺធ្វើឡើងដេីម្បីជាការក្រើនរំឮកដល់ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តនីមួយៗ ក្នុងការចូលរួម ការពារទប់ស្កាត់ការចម្លងមេរោគអេដស៍ និងជំងឺអេដស៍ ជៀសផុតពីការប្រើប្រាស់គ្រឿងញៀន និងជាការពញ្ញាក់ស្មារតីអោយមានការប្រុងប្រយ័ត្នបានខ្ពស់ ចំពោះបញ្ហាការធ្វើដំណើរទៅគ្រប់ទីកន្លែង មានស្មារតីទទួលខុសត្រូវ រក្សាសុខសុវត្ថិភាព ជាចំណែកក្នុងការចូលរួមកាត់បន្ថយគ្រោះថ្នាក់ចរាចរណ៍ ទាំងអស់គ្នា។ នាឱកាសនោះដែរ ឯកឧត្តមរដ្ឋលេខាធិការ បានថ្លែងអំណរគុណ និងផ្តល់នូវមតិចែករំលែក កើនរំឮកដូចនេះថា ៖ ការអនុវត្តកិច្ចការងារប្រកបដោយប្រសិទ្ធភាព ត្រូវតែជៀសឳ្យឆ្ងាយពីគ្រឿងញៀន ត្រូវមានសុខភាពល្អ និងមានសុខសុវត្ថិភាពក្នុងការធ្វើដំណើរ នៅពេលចុះបំពេញការងារ។ ឯកឧត្តម ក៏បានពាំនាំនូវប្រសាសន៍ផ្តាំផ្ញើសួរសុខទុក្ខពី ឯកឧត្តមរដ្ឋមន្ត្រី ប៉េង ពោធិ៍នា ដល់ ថ្នាក់ដឹកនាំ មន្ត្រីរាជការ បុគ្គលិក និងកម្មករ បម្រើការនៅមន្ទីរសាធារណការ និងដឹកជញ្ជូន នៃខេត្តនីមួយៗ ដែលតែងខិតខំយកចិត្តទុកដាក់ក្នុងការបំពេញកិច្ចការងារ។ ទន្ទឹមនោះដែរ ឯកឧត្តមរដ្ឋលេខាធិការ បានអំពាវនាវ សូមឱ្យមានការចូលរួមគោរពអនុវត្តទាំងអស់គ្នា គឺត្រូវចូលរួមទប់ស្កាត់ការប្រើប្រាស់ និងត្រូវជៀសឱ្យឆ្ងាយពីគ្រឿងញៀន ចូលរួមការពារការចម្លងមេរោគអេដស៍ និងជំងឺអេដស៍ និងត្រូវគោរពច្បាប់ស្តីពីចរាចរណ៍ផ្លូវគោក ឱ្យបានគ្រប់ៗគ្នា៕