អញ្ជើញមកចូលរួមស្តាប់ការចែករំលែកបទពិសោធន៍របស់និស្សិត ដែលបានបម្រើការងារជាមួយក្រុមហ៊ុនជាដៃគូសហការរបស់វិទ្យាស្ថានតេជោសែន សាធារណការ និងដឹកជញ្ជូន និស្សិត ឆន ច័ន្ទរដ្ឋធានី កំពុងសិក្សាឆ្នាំទី៥ ជំនាន់ទី១ ឯកទេសសំណង់សាធារណការ ជំនាញប្រព័ន្ធចម្រោះទឹកកខ្វក់ បានបង្ហាញចំណាប់អារម្មណ៍ពីការទទួលបានឱកាសទៅបម្រើការងារជាមួយក្រុមហ៊ុនជាដៃគូសហការរបស់វិទ្យាស្ថាន និងការទទួលបានឱកាសនានា ដែលវិទ្យាស្ថានតេជោសែន សាធារណការ និងដឹកជញ្ជូន(TSIPWT)បានផ្តល់ឱ្យ។ សូមបញ្ជាក់ផងដែរថា៖ ជំនាញប្រព័ន្ធចម្រោះទឹកកខ្វក់ ជាជំនាញមួយដែលកំពុងតែមានតម្រូវការធនធានមនុស្សជាច្រើន ហើយនិស្សិតរៀនជំនាញនេះ តម្រូវឱ្យសិក្សារយៈពេល ៥ឆ្នាំ និងបំពេញកាតព្វកិច្ចចុះកម្មសិក្សា ដើម្បីអនុវត្ត សិក្សាស្រាវជ្រាវឯកសារបន្ថែម សម្រាប់សរសេរសារណា និងការពារសារណាបញ្ចប់ការសិក្សាថ្នាក់វិស្វករ។ ហេតុនេះ និស្សិតវិស្វករដែលសិក្សានៅ TSIPWT ដែលជាគ្រឹះស្ថានឧត្តមសិក្សាសាធារណៈ លើការបណ្តុះបណ្តាល និងកសាងធនធានមនុស្សក្នុងវិស័យ សំណង់សាធារណការ នឹងទទួលបានឱកាសប្រកួតប្រជែងការងារខ្ពស់ ដើម្បីឆ្លើយតបទៅនឹងតម្រូវការធនធានមនុស្សក្នុងពេលបច្ចុប្បន្ន។ បន្ថែមពីនេះ វិទ្យាស្ថានមិនត្រឹមតែមានដៃគូសហការជាមួយមន្ទីរសាធារណការ និងដឹកជញ្ជូនរាជធានី-ខេត្ត ប៉ុណ្ណោះទេ វិទ្យាស្ថាននៅមានដៃគូសហការជាច្រើនទៀតជាមួយបណ្តាក្រុមហ៊ុនឯកជន ក្រុមហ៊ុនសាងសង់ធំៗ ទាំងជាតិ និងអន្តរជាតិ ហើយកំពុងបន្តកិច្ចសហការបន្ថែមទៀតដើម្បីស្វែងរកឱកាសជួយដល់និស្សិតវិទ្យាស្ថាន៕