សេចក្តីព្រាងវិសោធនកម្មច្បាប់ ស្តីពីផ្លូវថ្នល់ ត្រូវបានពិនិត្យ និងពិភាក្សាបន្ថែម ជាមួយក្រុមការងារជំនាញទីស្តីការគណៈរដ្ឋមន្រ្តី នាព្រឹកថ្ងៃ២២ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តម ប៉ាល់ ចន្ទតារា រដ្ឋលេខាធិកា ក្រសួងសាធារណការ និងដឹកជញ្ជូន បានដឹកនាំក្រុមការងារជំនាញក្រសួង ចូលរួមប្រជុំបច្ចេកទេស ដើម្បីពិនិត្យ និងពិភាក្សាលើសេចក្តីព្រាងវិសោធនកម្មច្បាប់ ស្តីពីផ្លូវថ្នល់ ក្រោមការដឹកនាំដោយ ឯកឧត្តម លីវ សុវណ្ណា អនុប្រធាន និងជាប្រធានក្រុមការងារទី៤ នៃក្រុមប្រឹក្សាអ្នកច្បាប់ និង ឯកឧត្តម អ៊ូច ថោងសេង អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។ កិច្ចប្រជុំនេះមានការចូលរួមពី ឯកឧត្តម យិត បុណ្ណា រដ្ឋលេខាធិការ ឯកឧត្តម លោកជំទាវ នៃក្រុមប្រឹក្សាអ្នកច្បាប់ ឯកឧត្តម លោក លោកស្រី តំណាងអគ្គនាយកដ្ឋានពាក់ព័ន្ធ លេខាធិការដ្ឋាននៃគណៈកម្មាធិការសម្របសម្រួលអចិន្ត្រៃយ៍ និងមន្រ្តីជំនាញពាក់ព័ន្ធ។ កិច្ចប្រជុំនេះរៀបចំឡើង ក្នុងគោលបំណង ពិនិត្យពិភាក្សា ផ្លាស់ប្ដូរយោបល់ទៅលើជំពូក ឬមាត្រាមួយចំនួននៃច្បាប់ស្តីពីផ្លូវថ្នល់ ដែលចាំបាច់ត្រូវធ្វើវិសោធនកម្ម ដើម្បីឆ្លើយតបតាមការស្នើសុំពីវិស័យឯកជន និងការវិវឌ្ឍរបស់សង្គម ជាពិសេសធានាថាខ្លឹមសារដែលត្រូវធ្វើវិសោធនកម្មនៃច្បាប់នេះមានភាពគ្រប់ជ្រុងជ្រោយ មានសង្គតិភាព និងអាចយកប្រើប្រាស់បានស្របទៅតាមគតិច្បាប់៕