ការដ្ឋាន ១ កន្លែង បានសាងសង់របងសុវត្ថិភាពព័ទ្ធស័ង្កសីមកលើផ្លូវសាធារណៈបង្កការរំខានដល់អ្នកធ្វើដំណើរ ខណៈផ្លូវលេខ ៣៣៦ ក៏កំពុងធ្វើការអភិវឌ្ឍន៍ប្រព័ន្ធលូបង្ហូរទឹក ទើបមានអ្នកដំណើរវាងផ្លូវផ្សេងមកកកស្ទះចរាចរណ៍រៀងរាល់ពេលត្រង់កន្លែងការដ្ឋាននេះ។ទីតាំងការដ្ឋានព័ទ្ធរបងស័ង្កសីមកលើផ្លូវសាធារណៈនេះស្ថិតនៅតាមបណ្ដោយផ្លូវលេខ ២៥៥ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។លោក វណ្ណា ជាអ្នករត់កង់បីឥណ្ឌានៅម្ដុំផ្លូវនោះ បានឲ្យដឹងថា ផ្លូវនេះពីមុនមកមិនដែលមានការកកស្ទះនោះទេ ប៉ុន្តែដោយសារមានការអភិវឌ្ឍប្រព័ន្ធលូរំដោះទឹកថ្មី ទើបខាងអាជ្ញាធរបានធ្វើការបិទផ្លូវនោះបណ្ដោះអាសន្ន ដូច្នេះហើយទើបមធ្យោបាយធ្វើដំណើរទាំងអស់ត្រូវជិះវាងផ្លូវមកដល់ត្រង់ចំណុចការដ្ឋានកំពុងសាងសង់នេះ។លោកបានបន្តទៀតថា មូលហេតុកកស្ទះចរាចរណ៍ ដោយសារតែទីតាំងការដ្ឋានខាងលើនេះបានសង់របងស័ង្កសីមកលើចំណីផ្លូវ ធ្វើឲ្យផ្លូវតូចចង្អៀត។ នៅពេលមានមធ្យោបាយធ្វើដំណើរឆ្លងកាត់ច្រើន ច្បាស់ណាស់នឹងមានការកកស្ទះតែម្ដង។ដោយឡែក លោក ហែម ជាប្រជាពលរដ្ឋ បានលើកឡើងថា ហេតុអ្វីបានជាទីតាំងការដ្ឋានខាងលើអាចសង់របងលើចំណីផ្លូវបាន ហើយពិតជាបង្កការកកស្ទះចរាចរណ៍ពេលមានមធ្យោបាយធ្វើដំណើរច្រើន។ លោកក៏បានសំណូមពរដល់អាជ្ញាធរមូលដ្ឋាន សូមមេត្តាជួយចុះពិនិត្យមើលផង ចំពោះការសាងសង់របងស័ង្កសីលើចំណីផ្លូវដូច្នេះ។ ពាក់ព័ន្ធបញ្ហានេះ លោក ជា ពិសី អភិបាល នៃគណៈអភិបាលខណ្ឌទួលគោក បានបញ្ជាក់ឲ្យកម្ពុជាថ្មីដឹងថា លោកនឹងចាត់មន្ត្រីជំនាញឲ្យចុះពិនិត្យមើលជាបន្ទាន់ និង សូមអរគុណ កម្ពុជាថ្មី ដែលបានរាយការណ៍ជូន៕