(កំពត-កែប)៖ អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ឯកឧត្តមឧបនាយករដ្ឋមន្ត្រី ស៊ុន ចាន់ថុល នាព្រឹកថ្ងៃទី០៣ ខែកក្ដដា ឆ្នាំ២០២៥នេះ បានអញ្ជើញដឹកនាំមន្ត្រីជំនាញពាក់ព័ន្ធរួមជាមួយអាជ្ញាធរមូលដ្ឋានចុះកំណត់ផ្ទៀងផ្ទាត់និយាមកា និងបោះបង្គោលព្រំដី តាមបណ្ដោយព្រែកជីកហ្វូណនតេជោ និងពិនិត្យទីតាំងហេដ្ឋារចនាសម្ព័ន្ធ សម្រាប់គាំទ្រគម្រោងព្រែកជីកហ្វូណនតេជោ ក្នុងភូមិសាស្ត្រខេត្តកំពត និងខេត្តកែប។ ការចុះពិនិត្យទីតាំងទី១ស្ថិត នៅក្នុងភូមិជ្រោះតាសោម ឃុំប្រាសាទភ្នំខ្យង ស្រុកកំពង់ត្រាច ខេត្តកំពត និងទីតាំងទី២នៅភូមិអន្លង់ធ្លក ឃុំ អំពេង ស្រុកដំណាក់ចង្អើរនិងទីតាំងទី៣នៅចំណុចឆ្នេរអង្កោល ស្ថិតក្នុងខេត្តកែប ដែលមានការចូលរួមពីពីលោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន និងលោក ម៉ៅ ធនិន្ទ អភិបាលខេត្តកំពត លោក សោម ពិសិទ្ធិ អភិបាលខេត្តកែប រួមជាមួយភាគីពាក់ព័ន្ធជាច្រើនរូបទៀតផងដែរ។ ការចុះត្រួតពិនិត្យកំណត់ផ្ទៀងផ្ទាត់និយាមកា និងបោះ បង្គោលព្រំដី តាមបណ្ដោយព្រែកជីកហ្វូណនតេជោ និងពិនិត្យទីតាំងហេដ្ឋារចនាសម្ព័ន្ធ សម្រាប់គាំទ្រគម្រោងព្រែកជីកហ្វូណនតេជោនៅពេលនេះដើម្បីរៀបចំគម្រោងហេដ្ឋារចនាសម្ព័ន្ធដែលនៅតាមសងខាងតំបន់ព្រែកជីកហ្វូណនតេជោ ដោយនៅក្នុងនោះមានដូចជាគម្រោងផែរណប គម្រោងហេដ្ឋារចនាសម្ព័ន្ធស្ពាន-ថ្នល់ គម្រោងទាក់ទងនឹងតំបន់សេដ្ឋកិច្ចពិសេស តំបន់ពាណិជ្ជកម្ម តំបន់អភិវឌ្ឍទេសចរណ៍ តំបន់តភ្ជាប់ជាមួយប្រព័ន្ធធារាសាស្រ្ត តភ្ជាប់ជាមួយច្រករបៀង និងតំបន់ប៉ូលសេដ្ឋកិច្ចផ្សេងទៀត៕