វគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ (Road Design Specification: Road Geometry) ខេត្តសៀមរាប៖ នាថ្ងៃចន្ទ ទី១៦ ខែមិថុនា ឆ្នាំ២០២៥ ឯកឧត្តម នូ វឌ្ឍនៈ អនុរដ្ឋលេខាធិការ ក្រសួងសាធារណការ និងដឹកជញ្ជូន តំណាងឯកឧត្តមបណ្ឌិត យិត បុណ្ណា រដ្ឋលេខាធិការទទួលបន្ទុកបច្ចេកទេស បានអញ្ជើញជាអធិបតីបើកវគ្គបណ្តុះបណ្តាល និងផ្សព្វផ្សាយបទដ្ឋានសិក្សាគម្រោងផ្លូវថ្នល់ ស្តីពីការឌីហ្សាញធរណីមាត្រផ្លូវ (Road Design Specification: Road Geometry) រៀបចំដោយអគ្គនាយកដ្ឋានបច្ចេកទេស ដោយមានការចូលរួមពីថ្នាក់ដឹកនាំទទួលបន្ទុកការងារបច្ចេកទេស ទីប្រឹក្សាក្រសួង អគ្គនាយកបច្ចេកទេស អគ្គនាយករងមកពីអគ្គនាយកដ្ឋានពាក់ព័ន្ធ សិក្ខាកាមពីនាយកដ្ឋានអនុវត្តគម្រោងថ្នាក់កណ្ដាលរបស់ក្រសួង ព្រមទាំងក្រសួងសេដ្ឋកិច្ច និងហិរញ្ញវត្ថុ មន្ទីរសាធារណការ និងដឹកជញ្ជូនទាំង២៥ រាជធានី-ខេត្ត និងគ្រប់អង្គភាពវិស្វកម្ម ដែលអនុវត្តគម្រោងស្ថិតក្រោមអាណាប័កក្រសួងសាធារណការ និងដឹកជញ្ជូនផងដែរ។ វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណងផ្សព្វផ្សាយដល់ក្រសួងស្ថាប័នពាក់ព័ន្ធទាំងអស់ នូវបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ក្រោមកិច្ចសហប្រតិបត្តិការបច្ចេកទេសក្រុមជំនាញការ P4I & Austroads នៃប្រទេសអូស្ដា្រលី ដែលជាផ្នែកមួយនៃកិច្ចខិតខំប្រឹងប្រែងរបស់ក្រសួងសាធារណការ និងដឹកជញ្ជូន ក្នុងគោលបំណងធ្វើឱ្យប្រសើរឡើងនូវគុណភាពហេដ្ឋារចនាសម្ព័ន្ធផ្លូវថ្នល់ក្នុងព្រះរាជាណាចក្រកម្ពុជា ក៏ដូចជាការឆ្លើយតបទៅនឹងការវិវឌ្ឍសកលភាវូបនីយកម្មបច្ចេកវិទ្យាឌីជីថល ជាពិសេសការបង្កើនភាពធន់ទៅនឹងការប្រែប្រួលអាកាសធាតុ ដែលពិភពលោកកំពុងជួបប្រទះនាពេលបច្ចុប្បន្ន។ ផ្អែកតាមរបាយការណ៍របស់អគ្គនាយក នៃអគ្គនាយកដ្ឋានបច្ចេកទេស ការធ្វើបច្ចុប្បន្នភាពបទដ្ឋានបច្ចេកទេសសំណង់ផ្លូវថ្នល់របស់ក្រសួងសាធារណការ និងដឹកជញ្ជូន ក្នុងជំហានទី១ ត្រូវបានទទួលឯកសារផ្លូវការពីរដ្ឋាភិបាលនៃប្រទេសអូស្ត្រាលី និងបានប្រកាសដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន កាលពីដើមខែមីនា ឆ្នាំ២០២៥ កន្លងទៅនេះ ដែលមានបទដ្ឋានបច្ចេកទេសចំនួន ៧ផ្នែកធំៗ និងមាន២៦បទដ្ឋាន ក្នុងនោះមានដូចជា ១) ផ្នែកធរណីមាត្រផ្លូវ (Road Geometry Design) មាន ៣បទដ្ឋាន, ២) ផ្នែកកម្រាលផ្លូវ (Road Design Specification, Part 2-Pavement) មាន ១បទដ្ឋាន, ៣) ផ្នែកប្រព័ន្ធរំដោះទឹក (Drainage Design) មាន ៣បទដ្ឋាន, ៤) ផ្នែកបរិក្ខារគ្រប់គ្រងចរាចរណ៍ (Traffic Control Devices) មាន ៣បទដ្ឋាន, ៥) ផ្នែកស្ពាន (Bridge Design) មាន ២បទដ្ឋាន, ៦) ផ្នែកបទដ្ឋានសំណង់សាធារណការ (Construction Specification) មាន ៦បទដ្ឋាន, និង ៧) ផ្នែកធ្វើតេស្តសម្ភារៈសំណង់ (Test Method) មាន ៨បទដ្ឋាន។ ថ្លែងនាឱកាសនោះ ឯកឧត្តមអនុរដ្ឋលេខាធិការ បានវាយតម្លៃខ្ពស់ចំពោះ កិច្ចខិតខំប្រឹងប្រែងរបស់ថ្នាក់ដឹកនាំក្រសួង អគ្គនាយកដ្ឋានបច្ចេកទេស ព្រមទាំងមន្ត្រីបច្ចេកទេសពាក់ព័ន្ធ ដែលបានយកចិត្តទុកដាក់ ចូលរួមអនុវត្តការងាររបស់ក្រសួងនារយៈពេលកន្លងមក ជាពិសេសបានចូលរួមសហការគ្នារៀបចំវគ្គបណ្តុះបណ្តាល និងផ្សព្វផ្សាយបទដ្ឋានបច្ចេកទេសនេះឡើង និងសូមឱ្យឯកឧត្តម លោក លោកស្រី ជាសិក្ខាកាម ត្រូវតាំងចិត្តត្រងត្រាប់ និងកុំស្ទាក់ស្ទើរក្នុងការសួរសំណួរពាក់ព័ន្ធលើផ្នែកបច្ចេកទេស ដើម្បីបំបាត់មន្ទិលផ្សេងៗ ក៏ដូចជាចូលរួមមតិកែលម្អ និងចែករំលែកនូវបទពិសោធន៍ ដែលបានអនុវត្តការងារកន្លងមក៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube