រាជធានីភ្នំពេញ៖ គិតត្រឹមដើមខែមិថុនា ឆ្នាំ២០២៥ ស្ពានអាកាសសម្តេចធិបតី ហ៊ុន ម៉ាណែត ដែលមានទិសដៅឆ្ពោះទៅកាន់អាកាសយានដ្ឋានអន្តរជាតិតេជោ បានសម្រេចការសាងសង់ប្រមាណ៨៥ភាគរយ ឈានដល់ដំណាក់ការតភ្ជាប់តួស្ពាន…។ ស្ពានអាកាសសម្តេចធិបតី ហ៊ុន ម៉ាណែត ជាស្ពានអាកាសភ្លោះ មានទីតាំងនៅចំព្រំប្រទល់រវាងរាជធានីភ្នំពេញ និងខេត្តកណ្តាល។ បន្ទាប់ពីសម្រេចការសាងសង់បានប្រមាណ៨៥ភាគរយ អភិបាលរាជធានីភ្នំពេញ លោក ឃួង ស្រេង និងលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ នៅព្រឹកថ្ងៃចន្ទទី៩មិថុនា ឆ្នាំ២០២៥នេះ បានរៀបចំធ្វើពិធីតភ្ជាប់តួស្ពានទាំងមូល។ ក្នុងនោះ ស្ពានភ្លោះដែលមួយមានទិសដៅពីភ្នំពេញទៅអាកាសយានដ្ឋានអន្តរជាតិតេជោ នឹងសាងសង់រួចរាល់នៅចុងខែមិថុនា ខណៈស្ពានអាកាសមានទិសដៅពីអាកាសយានដ្ឋានអន្តរជាតិតេជោ មកភ្នំពេញវិញ នឹងរួចរាល់នៅចុងខែកក្កដា ឆ្នាំ២០២៥។សូមជម្រាបថា ស្ពានអាកាសភ្លោះថ្មីនេះ បានបើកការដ្ឋានសាងសង់ កាលពីថ្ងៃទី១៧ ខែមិថុនា ឆ្នាំ២០២៤ ដោយរាជរដ្ឋាភិបាល ក្រោមថវិកាចំនួន១៦ ២០០ ៥០០ដុល្លារអាម៉េរិក ជាមួយរយៈពេលសាងសង់ចំនួន១ឆ្នាំ។ ស្ពានអាកាស ជាប្រភេទបេតុងអាមេ មានបណ្ដោយស្ពាន៦២២ម៉ែត្រ។ ស្ពានទី១.ផ្លូវឯកទិសមានទិសដៅតាមបណ្តោយមហាវិថីសម្តេចតេជោ ហ៊ុន សែន ឆ្លងកាត់ផ្លូវជាតិលេខ២ ឆ្ពោះទៅកាន់អាកាសយានដ្ឋានអន្តរជាតិតេជោ ស្ពានទី២.ផ្លូវឯកទិសមានទិសដៅឆ្លងកាត់ផ្លូវជាតិលេខ២ពីអាកាសយានដ្ឋានអន្តរជាតិតេជោ ឆ្ពោះទៅកាន់មហាវិថីសម្តេចតេជោហ៊ុន សែន។ ស្ពាននេះក៏អាចផ្ទុកទម្ងន់ដល់២៥តោន កម្ពស់សុវត្ថិភាព៥,៥០ម៉ែត្រ និងមានគន្លងចរាចរណ៍ចំនួន៣៕