កិច្ចប្រជុំដោះស្រាយជុំវិញការប្រមូលទិន្នន័យសម្រាប់រៀបចំប្លង់បច្ចេកទេសលម្អិតសម្រាប់សាងសង់ព្រែកជីកហ្វូណនតេជោ និងហេដ្ឋារចនាសម្ព័ន្ធពាក់ព័ន្ធ ខេត្តកែប៖ នាថ្ងៃពុធ ទី២៨ ខែឧសភា ឆ្នាំ២០២៥ ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប បានដឹកនាំកិច្ចប្រជុំជាមួយក្រុមហ៊ុនសាងសង់ CRBC ដើម្បីដោះស្រាយបញ្ហាប្រឈមរវាងក្រុមហ៊ុន និងប្រជាពលរដ្ឋនៅមូលដ្ឋានលើការប្រមូលទិន្នន័យតាមរយៈការខួងរណ្តៅដីជាច្រើនសម្រាប់រៀបចំប្លង់បច្ចេកទេសលម្អិតសម្រាប់សាងសង់ព្រែកជីកហ្វូណនតេជោ និងហេដ្ឋារចនាសម្ព័ន្ធពាក់ព័ន្ធ និងបានពិភាក្សាលើការជាន់ប្លង់ដីរបស់រដ្ឋ និងឯកជនជាមួយខ្សែផ្លូវនៃព្រែកជីកហ្វូណនតេជោ ក្នុងភូមិសាស្រ្តខេត្តកែប ដោយមានការចូលរួមពីសំណាក់ លោកប្រធាននាយកដ្ឋានហេដ្ឋរចនាសម្ព័ន្ធផ្លូវទឹក និងសំណង់កំពង់ផែ លោកអភិបាលស្រុក និងប្រធានមន្ទីរពាក់ព័ន្ធក្នុងខេត្តកែប និងមន្រ្តីបច្ចេកទេសពាក់ព័ន្ធ។ ក្នុងកិច្ចប្រជុំនេះផងដែរ ក្រុមហ៊ុនសាងសង់ CRBC បានធ្វើបទបង្ហាញអំពីចំនួនរណ្តៅដីដែលត្រូវខួង(១៧៥ រណ្តៅ) ប្រភេទទិន្នន័យដែលត្រូវប្រមូលសម្រាប់អនុវត្តការងាររៀបចំប្លង់បច្ចេកទេសសម្រាប់ព្រែកជីក និងហេដ្ឋារចនាសម្ព័ន្ធពាក់ព័ន្ធ។ ជាលទ្ធផល អង្គប្រជុំបានឯកភាពលើផែនការការងាររួម និងយន្តការសម្របសម្រួលជាមួយប្រជាជន ដើម្បីកាត់បន្ថយជម្លោះ និងជុំរុញការងារសម្រេចឱ្យជោគជ័យតាមផែនការ និងបានស្នើក្រុមហ៊ុន CRBC ក្នុងការសម្របសម្រួលផ្តល់ផែនការអនុវត្តការងារប្រមូលទិន្នន័យជាមួយអាជ្ញាធរខេត្ត និងមន្ទីរពាក់ព័ន្ធដើម្បីងាយស្រួលសម្របសម្រួល និងដោះស្រាយ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube