ប្រជាពលរដ្ឋចំនួន ២ ឃុំ គឺ ឃុំអូរដំបង ២ និង ឃុំរាំងកេសី ស្ថិតក្នុងទឹកដីស្រុកសង្កែ ខេត្តបាត់ដំបង ទទួលបានផ្លូវក្រាលកៅស៊ូចំនួន ១ ខ្សែ មានប្រវែងប្រមាណ ១៥ គីឡូម៉ែត្រ ដែលធ្វើឲ្យពលរដ្ឋមានភាពសប្បាយរីករាយ និងត្រេកអរក្រៃលែង ដោយសារតែផ្លូវនេះអាចជួយសម្រួលដល់ការធ្វើចរាចរណ៍ និងជួយឲ្យពួកគាត់បានដឹកកសិផលចេញមកលើទីផ្សារបានស្រួលផងដែរ។ផ្លូវ ១ ខ្សែ ខាងលើនេះ ត្រូវបានកសាងឡើងដោយមន្ទីរអភិវឌ្ឍន៍ជនបទ ភ្ជាប់ជាមួយផ្លូវជាតិលេខ ៥ ត្រង់ចំណុចភូមិពុកឆ្មា ដោយបានឆ្លងកាត់ភូមិដំបូងខ្ពស់ ភូមិទួលល្វៀង ភូមិកំណប់ ភូមិសំរោងកោង ភូមិដំណាក់ដង្កោ ភូមិរាំងក្រោល និងភូមិរាំងកេសី ដោយផ្លូវនេះត្រូវបញ្ចប់នៅត្រង់ចំណុចខាងមុខវត្តកណ្ដាល។គួរបញ្ជាក់ថា ផ្លូវ ១ ខ្សែនេះ គឺជាគម្រោងក្រាលកៅស៊ូ ដើម្បីឲ្យប្រជាពលរដ្ឋនៅទីជនបទបានប្រើប្រាស់ ប៉ុន្តែនៅត្រង់ចំណុចវត្តកំណប់ ដោយសារផ្លូវនេះមានការបត់បែនខ្លាំង និងជាតំបន់ទីប្រជុំជន ដូច្នេះមន្ទីរជំនាញបានកាត់កៅស៊ូ ដោយធ្វើការចាក់ជាបេតុងប្រវែងប្រមាណ ១ គីឡូម៉ែត្រ ជំនួសវិញ ជៀសវាងនូវការខូចខាតទៅលើផ្លូវកៅស៊ូឆាប់រហ័សពេក។ប្រជាពលរដ្ឋជាច្រើនដែលរស់នៅតាមបណ្ដោយផ្លូវនេះបានលើកឡើងថា ពួកគាត់មានអារម្មណ៍សប្បាយរីករាយដោយសារទទួលបានផ្លូវកៅស៊ូ ១ ខ្សែនេះ ព្រោះអាចធ្វើឲ្យគាត់បានធ្វើចរាចរណ៍ងាយស្រួល មិនមានភក់ជ្រាំ និងអាចដឹកកសិផលបានស្រួលទៅកាន់ទីផ្សារផង។ បន្ថែមនោះ រដូវភ្លៀងកាន់តែកៀកចូលមកដល់ ជំនាញ កំពុងសម្រុកទៅលើផ្លូវ ១ ខ្សែនេះ ដើម្បីឲ្យបានរួចរាល់ជាស្ថាពរនៅពេលដ៏ខ្លីខាងមុខនេះ៕