កែប៖ នៅថ្ងៃពុធ ៩រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃ០៣ ខែតុលា ឆ្នាំ២០១៨ អាជ្ញាធរខេត្តកែបបានបន្តបើកយុទ្ធនាការពង្រឹងសុវត្តិភាពចរាចរណ៍នៅតាមផ្លូវជាតិលេខ៣៣A ដែលស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប ដឹកនាំដោយលោក ព្រុំ គន្ធី អភិបាលរងខេត្តជាតំណាងឱ្យ ឯកឧត្តម កែន សត្ថា អភិបាលនៃគណៈអភិបាលខេត្តកែប និងប្រធានមន្ទីរសាធារណការ និងដឹកជញ្ជួនខេត្ត តំណាងស្នងការនគរបាលចរាចរណ៍ប្រមាណ ៥៥នាក់។ បន្ទាប់ពីនគបាលចរាចរណ៍បានឃាត់ម៉ូតូដែលមិនពាក់មួកសុវត្ថិភាពចំនួន៣០គ្រឿង ជាមួយគ្នានោះដែរ ក៏មានការផ្តល់មតិណែនាំឱ្យប្រជាពលរដ្ឋត្រូវតែចូលរួមគោរពច្បាប់ចរាចរណ៍ និងពាក់មួកសុវត្ថិភាព ដើម្បីបញ្ចៀស និងកាត់បន្ថយអត្រាគ្រោះថ្នាក់ចរាចរណ៍ឱ្យដល់កម្រិតទាបបំផុត។ ក្នុងរយៈពេលប្រមាណជាង២ម៉ោង កម្លាំងនគបាលបានឃាត់ម៉ូតូអត់ពាក់មួកសុវត្ថិភាពបានចំនួន៣០គ្រឿង ហើយក៏មានការសួរសំនួរចម្លើយ និងចែកជួនមួកសុវត្ថិភាពរបស់គណៈកម្មាធិការជាតិសុវត្តិភាពចរាចរណ៍ផ្តល់តាមរយៈអាជ្ញាធរខេត្តកែប បានចំនួន៣០មួកផងដែរ។ ជាចុងក្រោយលោក ព្រុំ គន្ធី អភិបាលរង និងជាតំណាងឱ្យ ឯកឩត្តមអភិបាលខេត្ត ក៏បានអំពាវនាវឱ្យប្រជាពលរដ្ឋសូមចូលរួមគោរពប្រតិបត្តិច្បាប់ចរាចរណ៍ឱ្យបានគ្រប់ៗគ្នា ដើម្បីសុវត្តិភាពរៀងៗខ្លួន និងដើម្បីប្រែក្លាយសណ្តាប់ធ្នាប់ចរាចរណ៍ឱ្យកាត់តែល្អប្រសើរថែមទៀត៕