គណៈប្រតិភូកម្ពុជាអញ្ជើញចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ានលើកទី៥៩ និងកិច្ចប្រជុំជាមួយដៃគូអភិវឌ្ឍន៍ពាក់ព័ន្ធ នៅទីក្រុងយ៉ាំងហ្គូន ប្រទេសមីយ៉ាន់ម៉ា ប្រទេសមីយ៉ាន់ម៉ា៖ នាថ្ងៃទី២១ ខែឧសភា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានឧត្តមមន្រ្តីដឹកជញ្ជូនកម្ពុជា បានដឹកនាំគណៈប្រតិភូកម្ពុជា ដែលមានមន្រ្តីមកពីអគ្គនាយកដ្ឋានពាក់ព័ន្ធនៃក្រសួងសាធារណការ និងដឹកជញ្ជូន រដ្ឋលេខាធិការដ្ឋានអាកាសចរស៊ីវិល ក្រសួងការបរទេស និងសហប្រតិបត្តិការអន្តរជាតិ ចូលរួមកិច្ចប្រជុំឧត្តមមន្រ្តីដឹកជញ្ជូនអាស៊ានលើកទី៥៩ និងកិច្ចប្រជុំជាមួយដៃគូអភិវឌ្ឍន៍ពាក់ព័ន្ធ នៅទីក្រុងយ៉ាំងហ្គូន ប្រទេសមីយ៉ាន់ម៉ា ចាប់ពីថ្ងៃទី២១ ដល់ថ្ងៃទី២៣ ខែឧសភា ឆ្នាំ២០២៥។ ការចូលរួមនេះធ្វើឡើងតបតាមការអញ្ជើញរបស់ក្រសួងដឹកជញ្ជូន និងទំនាក់ទំនង នៃប្រទេសមីយ៉ាន់ម៉ា ដែលជាប្រធានប្តូរវេនសម្រាប់ឆ្នាំ២០២៥ ហើយកិច្ចប្រជុំនេះក៏បាន និងកំពុងពិភាក្សាតាមរបៀបវារៈសំខាន់ៗដូចខាងក្រោម៖ - ពិនិត្យ លើសេចក្តីសម្រេចនានា ដែលថ្នាក់ដឹកនាំ និងក្រសួងស្ថាប័នពាក់ព័ន្ធផ្សេងៗ បានដាក់ចេញដើម្បីអនុវត្ត ក្នុងរយៈពេលមួយឆ្នាំចុងក្រោយនេះ - ពិនិត្យលើការសិក្សា និងការវាយតម្លៃ ផែនការយុទ្ធសាស្រ្តដឹកជញ្ជូនកូឡាឡំពួរ ២០១៦-២០២៥ - ពិនិត្យ ពិភាក្សាលើផែនការដឹកជញ្ជូនថ្មី សម្រាប់ដប់ឆ្នាំទៅមុខ ២០២៦-២០៣០ ដែលថ្នាក់ដឹកនាំ បានកំណត់ឱ្យឈ្មោះថា “ផែនការអន្តរវិស័យដឹកជញ្ជូន ២០២៦-២០៣០” - ពិនិត្យផែនការការងារ សម្រាប់ឆ្នាំ២០២៥-២០២៦ - ពិនិត្យ ផ្តល់អនុសាសន៍ និងអនុម័ត លើរបាយការណ៍ និងផែនការថ្មីៗ របស់ក្រុមការងារបច្ចេកទេស ទាំងបួន គឺក្រុមការងារដឹកជញ្ជូនផ្លូវអាកាស ក្រុមការងារដឹកជញ្ជូនផ្លូវគោក ក្រុមការងារដឹកជញ្ជូនផ្លូវ សមុទ្រ និងក្រុមការងារសម្របសម្រួលការងារដឹកជញ្ជូន - ពិនិត្យវឌ្ឍនភាព និងកំណត់ការងារបន្ត ជាមួយដៃគូសន្ទនា មានជាអាទិ៍ ជាមួយប្រទេសចិន ជប៉ុនសាធារណរដ្ឋកូរ៉េ - ពិនិត្យលទ្ធភាព លើការងារត្រៀមចុះហត្ថលេខា លើកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស រវាងរដ្ឋាភិបាលអាស៊ាន-នូវែលសេឡង់ និងពិធីសារទី១ ស្ថិតក្រោមកិច្ចព្រមព្រៀងនេះ ស្ដីពីសិទ្ធិហោះហើរទី៣ ទី៤ និងទី៥ ក្នុងឆ្នាំ២០២៥។ សូមជម្រាបជូនផងដែរថា នាថ្ងៃចុងក្រោយ គឺថ្ងៃទី២៣ ខែឧសភា ឆ្នាំ២០២៥ ក៏មានកិច្ចសន្ទនា លើកទី៤ នៃឧត្តមមន្រ្តីដឹកជញ្ជូន អាស៊ាន-អាមេរិក ដើម្បីពិនិត្យវឌ្ឍនភាពការងារ ដែលបានកំណត់ក្នុងផែនការការងារ នៃកិច្ចសហការរវាង អាស៊ាន-អាមេរិក លើវិស័យដឹកជញ្ជូន ឆ្នាំ២០២២-២០២៥ និងពិភាក្សាលើ ផែនការការងារថ្មីសម្រាប់ឆ្នាំ ២០២៦-២០២៩ ក្រោយពីផែនការចាស់នឹងបញ្ចប់ក្នុងឆ្នាំ២០២៥ នេះ។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube