គិតមកដល់ពេលនេះ ស្ពានអាកាសសម្ដេចធិបតីហ៊ុនម៉ាណែត(ស្ពានអាកាសភ្លោះ៦០ម៉ែត្រ)សម្រេចការសាងសង់បានប្រមាណ៨០ភាគរយហើយ។ នេះបើតាមការបញ្ជាក់ពីលោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ។ ក្រុមការងារកំពុងតែមមាញឹកក្នុងការសាសសង់ ដើម្បីឱ្យរួចរាល់តាមគ្រោងទុក។ គួរជម្រាបថា ស្ពានអាកាសសម្ដេចធិបតីហ៊ុនម៉ាណែត ជាស្ពានប្រភេទបេតុងអាមេ( ធ្នឹមរាងអក្សរ I ) មានបណ្ដោយស្ពានសរុប៦២២ម៉ែត្រ, បណ្ដោយតួស្ពាន២៨១ម៉ែត្រ,ផ្លូវតភ្ជាប់ក្បាលស្ពានទៅមកខាងមហាវិថីសម្តេចតេជោហ៊ុនសែន(ផ្លូវ៦០ម៉ែត្រ)ប្រវែង១៨០ម៉ែត្រ និងផ្លូវតភ្ជាប់ក្បាលស្ពានទៅមកខាងព្រលានយន្តហោះអន្តរជាតិតេជោ១៦១ម៉ែត្រ។ ស្ពាននីមួយៗមានទទឹងតួស្ពានទំហំ៩,៥ម៉ែត្រ គន្លងផ្លូវរត់របស់តួស្ពាននីមួយៗមានចំនួន៣គន្លង (ទំហំ ៣,២៥ ម៉ែត្រ + ៣,២៥ ម៉ែត្រ + ២ ម៉ែត្រ) សម្រាប់ចរាចរឯកទិស។ស្ពានអាកាសភ្លោះនេះដែរ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយគ្រោងប្រើរយៈពេលសាងសង់ចំនួន១២ខែ និងត្រូវចំណាយថវិកាចំនួន១៦,២០០,៥០០ដុល្លារ ជាកញ្ចប់ថវិកាបានមកពីការបង្វែរកញ្ចប់ថវិកាពីគម្រោងសាងសង់ស្ពានអាកាស គង់ សំអុល និងមូលនិធិអភិវឌ្ឍកោះនរា។ ក្រៅពីសំណង់តួស្ពាន និងផ្លូវតភ្ជាប់ក្បាលស្ពានហើយនោះ គម្រោងស្ពានអាកាសភ្លោះនេះ ក៏នូវមានការសាងសង់ហេដ្ឋារចនាសម្ព័ន្ធមួយចំនួន ដែលត្រូវបំពាក់ភ្ជាប់ក្នុងគម្រោងរួមមានការបំពាក់បង្គោលភ្លើងបំភ្លឺផ្លូវ, ការដាក់ស្លាកសញ្ញាចរាចរណ៍, ការលាបគំនូសចរាចរណ៍,ការរៀបចំបណ្តាញលូអមសងខាងផ្លូវ, ការកែសម្រួលចិញ្ចើមផ្លូវក្នុងតំបន់ការដ្ឋាន ការដាំដើមឈើ-ដើមផ្កាលម្អ និង ការរៀបចំរចនាជាសួនច្បារបៃតង មានគម្លាត៩ម៉ែត្ររវាងប្រឡោះស្ពានទី១និងស្ពានទី២បន្ថែមទៀត៕