ផ្លូវខេត្តក្រចេះ លេខ ៣៧៧ និង៣៧៧A ក្រាលកៅស៊ូ AC ប្រវែងសរុប ៤៩,១០ គីឡូម៉ែត្រ បានស្ថាបនាបញ្ចប់ ១០០%។ នេះតាមការបញ្ជាក់ឲ្យដឹងរបស់មន្ទីរសាធារណៈការ និងដឹកជញ្ជូនខេត្តក្រចេះ។ផ្លូវខេត្តលេខ ៣៧៧ មានប្រវែង ៣៥.៥គីឡូម៉ែត្រ តភ្ជាប់ចាប់ពីរង្វង់មូលព្រាបសក្នុងក្រុងក្រចេះ ឆ្ពោះទៅស្រុកសំបូរ និងផ្លូវខេត្តលេខ ៣៧៧A មានប្រវែង ១៣,៦ គីឡូម៉ែត្រ ចាប់ពីផ្សារសណ្តាន់ ឃុំសណ្តាន់ តភ្ជាប់ទៅភូមិសង្គម ឃុំសណ្តាន់ នៃស្រុកសំបូរ ។ផ្លូវខេត្តទាំង ២ ខ្សែនេះ បានសម្ពោធបើកការដ្ឋានសាងសង់កាលពីថ្ងៃទី ៤ ខែមេសា ឆ្នាំ២០២៣ ដោយត្រូវស្តារពង្រីក និងលើកកម្រិតគុណភាពជាប្រភេទផ្លូវក្រាលបេតុងកៅស៊ូ AC និងសាងសង់ស្ពានថ្មីចំនួន ៩កន្លែង។លោក ភុំ សោភណ្ឌ ជាប្រជាពលរដ្ឋរស់នៅសង្កាត់ក្រគរ បានឲ្យដឹងថា រូបលោកមានការត្រេកអរយ៉ាងខ្លាំង ពេលមានផ្លូវស្អាត ការធ្វើដំណើរក៏ងាយស្រួល។ ម្យ៉ាងវិញទៀត បងប្អូនប្រជាពលរដ្ឋ ក៏ដូចជា អាជីវករលក់ដូរ នៅតាមដងផ្លូវ តាមផ្ទះ គឺមានការលក់ដាច់ជាងមុន ដោយសារមានភ្ញៀវទេសចរទៅមកច្រើនជាងមុន។ ដោយកាលពីមុនពលរដ្ឋភាគច្រើន ធ្វើដំណើរតាមដងផ្លូវជាតិលេខ ៧ ប៉ុន្តែឥឡូវនេះ បានត្រឡប់មកធ្វើដំណើរតាមផ្លូវមាត់ទន្លេ ឬផ្លូវខេត្តលេខ ៣៧៧ វិញ ដោយបច្ចុប្បន្នផ្លូវស្អាត មានម្លប់ដើមឈើអមតាមដងផ្លូវត្រជាក់ ជាពិសេសបានឆ្លងកាត់តំបន់រមណីយដ្ឋានទេសចរល្បីៗរបស់ខេត្តក្រចេះថែមទៀតផង៕