ខេត្តកំពតៈ រដ្ឋបាលខេត្តកំពតគ្រោងនឹងបង្កើតឱ្យមានរថភ្លើងប្រភេទល្បឿនលឿនសម្រាប់ដំណើរកំពត-ភ្នំពេញ និងព្រលានថ្មីមួយដើម្បីបម្រើសេចក្តីត្រូវការក្នុងទំហំថវិកាប្រមាណ៥០លានដុល្លារ។ ថ្លែងក្នុងពិធីស្វាគមន៍គណៈកម្មការទី១០ នៃព្រឹទ្ធសភាជាតិ នៅសាលប្រជុំសាលាខេត្តកាលពីចុងសប្តាហ៍កន្លងទៅ ឯកឧត្តម ជាវ តាយ អភិបាលខេត្តកំពតបានមានប្រសាសន៍ថា ៖ជាចក្ខុវិស័យ សម្រាប់គម្រោង នៅពេលខាងមុខ រដ្ឋបាលខេត្តនឹងបង្កើតឱ្យមានរថភ្លើងប្រភេទល្បឿនលឿនសម្រាប់ធ្វើដំណើរភ្នំពេញ-កំពត ដែលប្រើរយៈពេលប្រហែលមួយម៉ោងប៉ុណ្ណោះ។ ជាមួយគ្នានេះរដ្ឋបាលខេត្តកំពតក៏នឹងធ្វើព្រលានថ្មីមួយដែលអាចទាក់ទាញភ្ញៀវក្នុងស្រុក និងភ្ញៀវក្រៅស្រុកដូចបណ្តាប្រទេសជិតខាងដែរ។ គម្រោងទាំងនេះត្រូវចំណាយថវិកាប្រមាណ៥០លានដុល្លារ។ ឯកឧត្តមអភិបាលខេត្តបានបន្តថា៖ ដើម្បីឱ្យគម្រោងស្ថិតក្រោមចក្ខុវិស័យនេះដំណើរការដោយជោគជ័យ រដ្ឋបាលខេត្តនឹងបង្កើតក្រុមហ៊ុនមួយដែលមានឈ្មោះថា មូលធនអភិវឌ្ឍន៍ខេត្តកំពត។ មូលនិធិនេះតម្រូវឱ្យមានមួយពាន់ភាគហ៊ុន ពោលគឺមួយភាគហ៊ុនស្មើនឹងប្រាំម៉ឺនដុល្លារ ហើយប្រជាពលរដ្ឋទូទៅក៏អាចចូលរួមបានទាំងអស់ ។ ឯកឧត្តមនឹងដាក់មួយរយភាគហ៊ុនស្មើនឹងប្រាំលានដុល្លារដើម្បីបើកមុខដឹកនាំធ្វើកិច្ចការនេះ។ ឯកឧត្តម ជាវ តាយ បានបញ្ជាក់ថា ឯកឧត្តមបាន និងកំពុងទំនាក់ទំនងជាមួយឯកឧត្តមទេសរដ្ឋមន្ត្រី ស៊ុន ច័ន្ធថុល រដ្ឋមន្ត្រីក្រសួងសាធារណៈការ និងដឹកជញ្ជូន ដើម្បីធ្វើគោលការណ៍ក្នុងការធ្វើកិច្ចការងារនេះចេញជារូបរាងតាមគម្រោងឱ្យបានត្រឹមត្រូវ និងបទដ្ឋានស្តង់ដារពិតប្រាកដ។ សូមរំលឹកថា ក្នុងរយៈពេលជិតប្រាំបួនខែបន្ទាប់ពីទទួលតំណែងជាអភិបាលខេត្តកំពត ឯកឧត្តម ជាវ តាយ មានគម្រោងបង្កើតសមិទ្ធផលធំៗមួយចំនួនព្រោះតែការយល់ឃើញពីសក្តានុពលដ៏សម្បូរបែប ដោយជារឿយៗ ឯកឧត្តមបញ្ជាក់ថា ត្រូវយកខេត្តចិញ្ចឹមខេត្ត យកឆ្នេរចិញ្ចឹមឆ្នេរជាដើម។ គម្រោងទាំងនោះ រួមមាន បង្កើតផ្សារសម្រាប់លក់ផលិតផលរបស់ខេត្ត បង្កើតឆ្នេរសម្រាប់លម្ហែកម្សាន្ត ស្ថាបនាវិមានឯករាជ្យសម្រាប់ពិធីបុណ្យជាតិម្តងៗ៕