(រតនគិរី)៖ លោក គ្លីម សុវណ្ណ មេឃុំល្បាំង១ និងលោក ផន ចាន់ថន មេឃុំល្បាំង២ ស្រុកលំផាត់ ខេត្តរតនគិរី បានសំណូមពរឱ្យអាជ្ញាធរស្រុកខេត្ត ជួយឈូសឆាយសម្រួលផ្លូវបេតុង ៩ខ្សែ ប្រវែង ៦៦គីឡូម៉ែត្រ នៅស្រុកលំផាត់ និងស្រុកកូនមុំឡើងវិញ ងាយស្រួលធ្វើដំណើរ ក្រោយពីក្រុមហ៊ុនធ្វើផ្លូវឈ្មោះ «នង សារិន មានសំណាង អ៉ិនវេសម៉ិន ខូអិលធីឌី» បានឈូសឆាយផ្លូវត្រាស់សេរួច តែទុកចោលដោយមិនទាន់ដឹងមូលហេតុច្បាស់លាស់។ ការសំណូមពរបែបនេះរបស់អាជ្ញាធរមូលដ្ឋានទាំងពីរឃុំ បានធ្វើឡើងដោយសារតែព្រួយបារម្ភជិតដល់រដូវវស្សា ពេលនោះផ្លូវនឹងពិបាកធ្វើដំណើរឆ្លងកាត់ជាខ្លាំង។ សូមបញ្ជាក់ថា កាលពីថ្ងៃទី២១ ខែកុម្ភៈ ឆ្នាំ២០២៥កន្លងទៅ រដ្ឋបាលខេត្តខេត្តរតនគិរី បានបើកការដ្ឋានសាងសង់ជាផ្លូវការផ្លូវបេតុង ៩ខ្សែ ប្រវែង ៦៦គីឡូម៉ែត្រ នៅស្រុកលំផាត់ និងស្រុកកូនមុំ ក្រោមអធិបតីភាពលោក ញ៉ែម សំអឿន អភិបាលខេត្តរតនគិរី និងលោកន ង សារិន អគ្គនាយកក្រុមហ៊ុន ព្រមទាំងមានការចូលរួមពីអភិបាលរងខេត្ត, លោកអភិបាលស្រុកលំផាត់, មេបញ្ជាការកម្លាំងប្រដាប់អាវុធទាំង៣, ប្រធាន-អនុប្រធានមន្ទីរ អង្គភាពពាក់ព័ន្ធជាច្រើនរូប។ មេឃុំល្បាំង១ និងមេឃុំល្បាំង២ បានថ្លែងប្រាប់ភ្នាក់ងារព័ត៌មាន Fresh News នៅព្រឹកថ្ងៃទី២១ ខែមេសា ឆ្នាំ២០២៥ ស្រដៀងគ្នាថា ផ្លូវក្នុងភូមិពួកគាត់ពីមុនល្អ តែបច្ចុប្បន្នក្រុមហ៊ុនដាក់គ្រឿងចក្រកាយខូចខាតអស់ ពេលភ្លៀងធ្លាក់ម្តងៗបងប្អូនប្រជាពលរដ្ឋក្នុងភូមិជួបប្រទះការលំបាកធ្វើដំណើរខ្លាំងណាស់។ មេឃុំទាំង២ បានបន្តថា «នៅពេលសួរនាំទៅខាងអ្នកធ្វើផ្លូវមានទាំងជនជាតិវៀតណាមផងនោះ បានឆ្លើយថា រង់ចាំលុយធ្លាក់មកសិនបានធ្វើបន្តទៀត ប៉ុន្តែរហូតមកដល់ថ្ងៃនេះគ្រឿងចក្រដកចេញទាំងអស់ ពោលគឺវេចបង្វិចរត់ ហើយសូម្បីតែថ្លៃទឹក ថ្លៃភ្លើងក៏មិនបង់ឱ្យដែរ»។ លោក គ្លីម សុវណ្ណ បញ្ជាក់ថា ក្រុមហ៊ុនចាប់ផ្តើមឈូសឆាយត្រាស់សេផ្លូវកាលពីថ្ងៃទី៨ ខែមីនា និងសង់ផ្លូវបេតុងចំនួន ២គីឡូម៉ែត្រ ជូនប្រជាពលរដ្ឋ។ សម្រាប់លោក ផន ចាន់ថន មេឃុំល្បាំង២, ក្រុមហ៊ុនចាប់ផ្តើមឈូសឆាយ ត្រាស់សេផ្លូវកាលពីថ្ងៃទី៤ ខែមីនា នឹងសង់ផ្លូវបេតុងចំនួន៦គីឡូម៉ែត្រ ជូនប្រជាពលរដ្ឋ។ លោកមេឃុំល្បាំង១ និងមេឃុំល្បាំង២ បានសំណូមពរទៅថ្នាក់លើអន្តរាគមន៍ទៅខាងក្រុមហ៊ុន ដាក់គ្រឿងចក្រជួយសម្រួលផ្លូវឡើងវិញ សម្រាប់ប្រជាពលរដ្ឋធ្វើដំណើរ ជាពិសេសនៅរដូវវស្សានេះ។ នៅព្រឹកថ្ងៃដដែលនេះ មានលេខទូរស័ព្ទ ០៧៦ ៦០១៥ ២៣៤ ដែលអះអាងថា ក្រុមហ៊ុន «នង សារិន មានសំណាង» បានទូរស័ព្ទមកភ្នាក់ងារព័ត៌មាន Fresh News ប្រចាំខេត្តរតនគិរី ដោយនិយាយយ៉ាងខ្លីថា គាត់ជាម្ចាស់លុយ តែអ្នកអនុវត្តគម្រោង អសមត្ថភាពក្នុងការដឹកនាំ ធ្វើមិនត្រូវតាមស្តង់ដា ម្ចាស់លុយផ្អាកបណ្តោះអាសន្ន ដោយរង់ចាំក្រុមហ៊ុនថ្មី ចូលធ្វើតាមស្តង់ដាយ៉ាងយូរខែឧសភាខាងមុខ រួចបិទទូរស័ព្ទទាក់ទងលែងបាន។ ទាក់ទិនទៅនឹងករណីខាងលើនេះដែរភ្នាក់ងារព័ត៌មាន Fresh News ប្រចាំខេត្តរតនគិរី បានសុំការបំភ្លឺពីលោក ស៊ូ សិរី អភិបាលរងខេត្ត និងជាអ្នកនាំពាក្យសាលាខេត្ត និងលោក ម៉ឹង ស៊ីនាថ នាយករដ្ឋបាលសាលាខេត្ត និងជាអ្នកនាំពាក្យសាលាខេត្ត តែលោកទាំងពីរគ្មានការឆ្លើយបំភ្លឺឡើយ។ សូមបញ្ជាក់ថា ផ្លូវដែលបើកការដ្ឋានចំនួន៩ខ្សែ ប្រវែង៦៦គីឡូម៉ែត្រ (ផ្លូវចាក់បេតុង) ខាងលើនេះ គ្រោងចំណាយថវិកាជាង ១០០លានដុល្លារ៕