កិច្ចប្រជុំពិនិត្យវឌ្ឍនភាពការងាររបស់គណៈកម្មាធិការគ្រប់គ្រងសំរាម សំណល់រឹងទីប្រជុំជន (គ.គ.ស.) ទីស្តីការក្រសួងបរិស្ថាន៖ នាថ្ងៃពុធ ថ្ងៃទី២៦ ខែមីនា ឆ្នាំ២០២៥ ឯកឧត្តម ចៅ សុភៈភិបាល អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងឯកឧត្តម ខាន់ ម៉ាណេរ រដ្ឋលេខាធិការក្រសួង សាធារណការ និងដឹកជញ្ជូន និងជាសមាជិក (គ.គ.ស.) បានអញ្ជើញចូលរួមកិច្ចប្រជុំគណៈកម្មាធិការគ្រប់គ្រងសំរាម សំណល់រឹងទីប្រជុំជន (គ.គ.ស.) ក្រោមអធិបតីភាព ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានគណៈកម្មាធិការគ្រប់គ្រងសំរាម សំណល់រឹងទីប្រជុំជន (គ.គ.ស.)។ កិច្ចប្រជុំនេះត្រូវបានរៀបចំឡើងដើម្បីពិនិត្យវឌ្ឍនភាពការងារគ្រប់គ្រងសំរាម សំណល់រឹងទីប្រជុំជន និងបង្ហាញពីគោលនយោបាយគ្រប់គ្រងសំរាម សំណល់រឹងទីប្រជុំជន ២០២០-២០៣០ ព្រមទាំងពិភាក្សាការងារចាំបាច់មួយចំនួន ដើម្បីបង្កើនប្រសិទ្ធភាព និងប្រសិទ្ធផលការងារគ្រប់គ្រងសំរាម សំណល់រឹងទីប្រជុំជន ពីដើមខ្សែដល់ចុងខ្សែ។ សូមបញ្ជាក់ផងដែរថា ក្រសួងសាធារណការ និងដឹកជញ្ជូន ជាស្ថាប័នថ្នាក់ជាតិទទួលខុសត្រូវលើការអនុវត្តគោលនយោបាយគ្រប់គ្រងសំរាម សំណល់រឹងទីប្រជុំជន ដោយសហការជាមួយក្រសួង-ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិក្នុងការកៀរគរប្រភពថវិកាពីដៃគូអភិវឌ្ឍន៍នានា សម្រាប់អនុវត្តវិនិយោគគម្រោងសាងសង់ជាទីលានទុកដាក់សំរាម សំណល់រឹងទីប្រជុំជនប្រកបដោយអនាម័យនៅតាមរាជធានី ក្រុង ស្រុក និងទីប្រជុំជននានា។ គិតត្រឹមឆ្នាំ ២០២៤ កម្ពុជា មានទីលានទុកដាក់សំរាម ចំនួន ១១កន្លែង កំពុងដំណើរការដែលមានបរិមាណស្តុកទុកដាក់សំរាម សរុបប្រមាណជាង ៤.៥លានតោន ដែលមានទីតាំងស្ថិតក្នុងក្រុងព្រះសីហនុ ក្រុងបាត់ដំបង ក្រុងកំពត ក្រុងកែប ក្រុងស្ទឹងសែន ក្រុងកំពង់ឆ្នាំង ក្រុងពោធិ៍សាត់ ក្រុងក្រចេះ ក្រុងស្ទឹងត្រែង ក្រុងសិរីសោភ័ណ និងក្រុងកំពង់ចាម៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube