កំពង់ផែខេត្តកោះកុង របស់កម្ពុជា និងកំពង់ផែ Fangchenggang របស់ប្រទេសចិន បានដាក់ឱ្យដំណើរការខ្សែច្រវាក់ដឹកជញ្ជូនទំនិញត្រជាក់ និងទំនិញទូទៅជាលើកដំបូង ដើម្បីជួយសម្រួល និងជំរុញការធ្វើពាណិជ្ជកម្មរវាងប្រទេសទាំងពីរ។ តាមរយៈផ្លូវដឹកជញ្ជូនថ្មីនេះ វានឹងរួមចំណែកជួយកាត់បន្ថយពេលវេលា និងថ្លៃដឹកជញ្ជូនបានមួយកម្រិតបន្ថែមទៀត។ តើអ្នកជំនាញមានការរំពឹងបែបណាចំពោះការដាក់ឱ្យដំណើរការផ្លូវដឹកជញ្ជូននេះ?ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេស កត់សម្គាល់ឃើញថា នៅមួយរយៈចុងក្រោយនេះ កប៉ាល់ដឹកជញ្ជូនទំនិញចេញចូលនៅកំពង់ផែ ខេត្តកោះកុង មានភាពមមាញឹកគួរឱ្យកត់សម្គាល់ ជាពិសេសកប៉ាល់មកពីកំពង់ផែ Fangchenggang ដែលជាប្រភេទកប៉ាល់ដឹកទូត្រជាក់ និងទំនិញទូទៅ។ អ្នកជំនាញរូបនេះជឿជាក់ថា តាមរយៈខ្សែដឹកជញ្ជូនថ្មីរវាងកំពង់ផែ ខេត្តកោះកុង និងកំពង់ Fangchenggang របស់ចិននេះ វានឹងជួយកាត់ពេលរយៈពេល និងថ្លៃដឹកជញ្ជូន ព្រមទាំងអត្ថប្រយោជន៍ជាច្រើនទៀតផងដែរ។ បើតាមឧកញ៉ា ស៊ិន ចន្ធី កប៉ាល់ដឹកទូត្រជាក់នឹងរួមចំណែកយ៉ាងសំខាន់ដល់ផលិតផលកសិកម្ម ខណៈផលិតនេះមានតម្រូវការលើទូត្រជាក់ ដើម្បីរក្សាគុណភាពនៅលើទីផ្សារ។ ជាមួយគ្នានេះ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានលើកឡើងថា បច្ចុប្បន្នកម្ពុជា មានតម្រូវការទូត្រជាក់ច្រើនសម្រាប់ដឹកជញ្ជូនទំនិញ និងរក្សាគុណភាពទំនិញសំខាន់ៗជាពិសេសផលិតកសិកម្ម ដូច្នេះតាមរយៈការដាក់ឱ្យដំណើរការផ្លូវដឹកជញ្ជូនខាងលើវានឹងជួយបំពេញតម្រូវការរបស់កម្ពុជា។ បើតាមការអះអាងរបស់ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតចិនប្រចាំកម្ពុជា ការដាក់ឱ្យដំណើរលើកដំបូងនៃផ្លូវដឹកជញ្ជូនទំនិញត្រជាក់ និងទំនិញទូទៅពីកំពង់ផែ Fangchenggang ប្រទេសចិនមកកាន់កំពង់ផែខេត្តកោះកុងរបស់កម្ពុជានេះ នឹងជួយកាត់បន្ថយពេលវេលាដឹកជញ្ជូនបានជាង៥០% និងថ្លៃដឹកជញ្ជូនបានជាង២០%៕