ភ្នំពេញ ៖នារយៈពេលកន្លងមក មានពលរដ្ឋ អ្នកឆ្លងកាត់ផ្លូវល្បឿនលឿនមួយចំនួនបានស្នើឱ្យក្រុមហ៊ុនគ្រប់គ្រងផ្លូវល្បឿនលឿន បំពាក់ភ្លើងបំភ្លឺផ្លូវចាប់ពីដើមផ្លូវដល់ចុងផ្លូវដើម្បីសម្រួលដល់ការបើកបរនៅពេលយប់ ។ពាក់ព័ន្ធ នឹងបញ្ហានេះដែរ ក្រុមហ៊ុនផ្លូវល្បឿនលឿនបានបកស្រាយបំភ្លឺ ពីមូលហេតុដែលក្រុមហ៊ុនមិនបំពាក់ភ្លើងបំភ្លឺផ្លូ ដោយយោងទៅលើកត្តាសំខាន់ៗចំនួន ៣យ៉ាងក្នុងនោះរួមមាន៖ 1. ផ្លូវល្បឿនលឿនត្រូវបានបំពាក់នូវប្រព័ន្ធចំណាំងផ្លាតលើផ្លូវ ដែលអាចឆ្លុះបញ្ចាំងឃើញគំនូសផ្លូវ ទ្រូងផ្លូវ គំនូសបែងចែកគន្លងផ្លូវ និងរបាំងកណ្តាលបានយ៉ាងច្បាស់លាស់។ នាពេលអ្នកបើកបរបើកភ្លើងបំភ្លឺផ្លូវខាងមុខនៅពេលយប់ ប្រព័ន្ធចំណាំងផ្លាតគន្លងផ្លូវទាំងសងខាងនឹងផ្លាតពន្លឺបានយ៉ាងច្បាស់នៅពេលប៉ះជាមួយភ្លើងរថយន្ត។2. ផ្លូវល្បឿនលឿនគឺមិនអនុញ្ញាតិឱ្យអ្នកថ្មើរជើង ទោចក្រយាន ត្រីចក្រយាន យានអូសដោយសត្វ ម៉ូតូកង់បួនប្រើប្រាស់ផ្លូវនេះទេ។ ភ្លើងបំភ្លឺផ្លូវជាធម្មតាគឺរចនាឡើងដើម្បីសម្រួលដល់អ្នកថ្មើរជើរ និងទោចក្រឬត្រីចក្រយានក្នុងករណីគ្មានពន្លឺបញ្ចាំង ឬខ្សោយពន្លឺ។ 3. ដើម្បីកាត់បន្ថយការប្រើប្រាស់ថាមពលព្រមទាំងគិតគូរអំពីបរិស្ថាន និងផលប៉ះពាល់ផ្សេងៗជាយថាហេតុ ម៉្យាងវិញទៀតបង្គោលភ្លើងត្រូវមានចន្លោះកំណត់ ពន្លឺដែលបំភ្លឺតាមផ្លូវអាចមានការបំភ្លឺមិនស្មើគ្នា ខ្លះភ្លឺខ្លះងងឹត។ ក្នុងការបើកបរដោយល្បឿនលឿន ការប្រែប្រួលពន្លឺបែបនេះអាចធ្វើឱ្យភ្នែកអស់កម្លាំង ឆាប់ហត់និងបង្កការងងុយក្នុងការបើកបរ ដែលអាចបណ្តាលឱ្យមានហានិភ័យលើសុវត្ថិភាពចរាចរណ៍។ក្រុមហ៊ុនផ្លូវល្បឿនលឿនបានបញ្ជាក់ថា ការមិនដំឡើងអំពូលភ្លើងបំភ្លឺតាមដងផ្លូវគឺជាការអនុវត្តតាមគោលការណ៍និងមាត្រដ្ឋានដែលទទួលស្គាល់ពីអន្តរជាតិ។ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុសូមអរគុណចំពោះការចូលរួមបញ្ចេញមតិក្នុងការស្ទង់មតិលើសេវាកម្មរបស់ផ្លូវល្បឿនលឿនភ្នំពេញ-ក្រុងព្រះសីហនុ។ មតិយោបល់របស់លោកអ្នកពិតជាមានសារៈសំខាន់ ចំពោះក្រុមហ៊ុន ដើម្បីក្រុមហ៊ុនធ្វើការកែលម្អ បំពេញបន្ថែមនូវចំណុចខ្វះខាត ដើម្បីផ្តល់សេវាកម្មឱ្យកាន់តែប្រសើរឡើងមួយកម្រិតទៀតជូនទៅដល់អតិថិជនដែលប្រើប្រាស់ផ្លូវល្បឿនលឿន ៕