កិច្ចប្រជុំបូកសរុបលទ្ធផលការងារ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ក្នុងត្រីមាសទី១ ឆ្នាំ២០២៥ ទីស្ដីការក្រសួង៖ នាព្រឹកថ្ងៃសុក្រ ទី១៤ ខែមីនា ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានអញ្ជើញដឹកនាំកិច្ចប្រជុំបូកសរុបលទ្ធផលការងារក្នុងត្រីមាសទី១ ឆ្នាំ២០២៥ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការទទួលបន្ទុក ប្រធាន អនុប្រធាន សមាជិក សមាជិកាលេខាធិការដ្ឋាន ប្រធានស្ថានីយជញ្ជីងអចល័តទូទាំងប្រទេស និងមន្ត្រីពាក់ព័ន្ធជាច្រើនរូប។ កិច្ចប្រជុំនេះរៀបចំឡើង ក្នុងគោលបំណងដើម្បីបូកសរុបលទ្ធផលការងារក្នុងត្រីមាសទី១ ឆ្នាំ២០២៥ របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និងពិនិត្យវឌ្ឍនភាពការងារដែលកំពុងអនុវត្ត រួមទាំងការដោះស្រាយបញ្ហាប្រឈមនានា ដើម្បីស្វែងរកដំណោះស្រាយរួមគ្នា ធ្វើយ៉ាងណាធានាឱ្យការអនុវត្តការងារប្រព្រឹត្តទៅដោយរលូន និងមានភាពល្អប្រសើរ ។ ទន្ទឹមនឹងនេះ លេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ គ្រោងនឹងរៀបចំវគ្គបណ្ដុះបណ្ដាលខ្លីៗ ដល់មន្ត្រីទទួលបន្ទុក នៅតាមស្ថានីយជញ្ជីងអចល័តទូទាំងប្រទេស ឱ្យទទួលបាននូវចំណេះដឹងថ្មីៗបន្ថែមទៀតសំដៅរួមចំណែកពង្រឹងការអនុវត្តការងារឱ្យកាន់តែមានប្រសិទ្ធភាពខ្ពស់ថែមទៀត។ សូមជម្រាបជូនថា យោងតាមរបាយការណ៍ នៃការអនុវត្តការងារក្នុងត្រីមាសទី១ ឆ្នាំ២០២៥ ស្តីពីលទ្ធផលការងារលេខាធិការដ្ឋាន របស់គណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ មានរថយន្ត ចំនួន ៥៩៦,១៤៣ គ្រឿង ត្រូវបានត្រួតពិនិត្យ ក្នុងនោះរថយន្តផ្ទុកមិនលើសទម្ងន់ ចំនួន ៤៣៣,៨១៦ គ្រឿង រថយន្តផ្ទុកលើសទម្ងន់ក្រោម៥% ចំនួន ១៦១,៩៩៩ គ្រឿង ក្នុងនោះ រថយន្តផ្ទុកលើសទម្ងន់ក្រោម ៥% - ១០% ចំនួន ១២៩ គ្រឿង រថយន្តផ្ទុកលើសទម្ងន់ពី ១០% - ២០% ចំនួន ១៦៦គ្រឿង និងរថយន្តផ្ទុកលើសទម្ងន់លើសពី ២០% ចំនួន៣៣គ្រឿង និងរថយន្តត្រូវបានពិន័យចំនួន៣២៨ គ្រឿង៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube