ជំនួបពិភាក្សាការងារជាមួយស្ថាប័នហេដ្ឋារចនាសម្ព័ន្ធអាស៊ី ស្ដីពីកាលានុវត្តភាពសម្រាប់ការអភិវឌ្ឍគម្រោងនានា ដើម្បីជំរុញវិស័យភស្ដុភារកម្មនៅកម្ពុជា ទីស្តីការក្រសួង៖ នាព្រឹកថ្ងៃអង្គារ ទី១១ ខែមីនា ឆ្នាំ២០២៥ ឯកឧត្តម ឈៀង ពេជ្រ អនុរដ្ឋលេខាធិការ ក្រសួងសាធារណការ និងដឹកជញ្ជូន ទទួលជួប និងពិភាក្សាការងារជាមួយស្ថាប័នហេដ្ឋារចនាសម្ព័ន្ធអាស៊ី (IA - Infrastructure Asia) ស្ដីពីកាលានុវត្តភាពសម្រាប់ការអភិវឌ្ឍគម្រោងនានា ដោយមានការអញ្ជើញចូលរួមពីថ្នាក់ដឹកនាំអគ្គនាយកភស្តុភារកម្ម និងមន្រ្តីជំនាញពាក់ព័ន្ធចំណុះអគ្គនាយកដ្ឋានភស្ដុភារកម្មជាច្រើនរូបផងដែរ។ ជំនួបពិភាក្សាការងារនេះ ធ្វើឡើងក្នុងគោលបំណងសំខាន់ៗចំនួន៣ គឺ (១) ពិនិត្យលើវឌ្ឍនភាពនៃគម្រោងអភិវឌ្ឍន៍មជ្ឈមណ្ឌលភស្ដុភារកម្មភ្នំពេញ (២) វឌ្ឍនភាពនៃគម្រោងអភិវឌ្ឍន៍មជ្ឈមណ្ឌលភស្ដុភារកម្មក្រុងព្រះសីហនុ និង (៣) កាលានុវត្តភាពនៃកិច្ចសហការវាងស្ថាប័ន IA ជាមួយនឹងក្រសួងសាធារណការ និងដឹកជញ្ជូន លើការអភិវឌ្ឍវិស័យភស្ដុភារកម្ម ដោយផ្តោតលើគំនិតផ្តួចផ្តើមគាំទ្រដល់គោលដៅអព្យាក្រឹតកាបូន (Carbon Neutrality) នៅកម្ពុជា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube