ជំនួបសម្តែងការគួសម និងពិភាក្សាការងារ ស្តីពីរបៀបវារៈនៃការរៀបចំកិច្ចប្រជុំក្រុមប្រឹក្សាភិបាលលើកទី១៩ របស់មជ្ឈមណ្ឌលចែករំលែកព័ត៌មានការប្រយុទ្ធប្រឆាំងនឹងចោរសមុទ្រ និងចោរប្លន់នាវាប្រដាប់អាវុធនៅអាស៊ី (ReCAAP ISC) ប្រទេសសិង្ហបុរី ៖នាថ្ងៃអង្គារ ទី១១ ខែមីនា ឆ្នាំ២០២៥ ឯកឧត្តម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ អមដំណើរដោយថ្នាក់ដឹកនាំអគ្គនាយកដ្ឋាន បានទទួលជួបសម្តែងការគួសម និងពិភាក្សាការងារជាមួយលោក Teo Eng Dih អភិបាលប្រទេសសិង្ហបុរី ប្រចាំ ReCAAP ISC និងជាប្រធានស្តីទី នៃកិច្ចប្រជុំក្រុមប្រឹក្សាភិបាលលើកទី១៩ របស់មជ្ឈមណ្ឌលចែករំលែកព័ត៌មានការប្រយុទ្ធប្រឆាំងនឹងចោរសមុទ្រ និងចោរប្លន់នាវាប្រដាប់អាវុធនៅអាស៊ី (ReCAAP ISC) អមដោយលោក Krishnaswamy Natarajan នាយកប្រតិបត្តិ ReCAAP ISC ព្រមទាំងសហការី។ ក្នុងជំនួបនោះដែរ ឯកឧត្តមអគ្គនាយក ត្រូវបានផ្តល់ការអបអរសាទរយ៉ាងខ្លាំងក្នុងនាមជាអភិបាលប្រទេសកម្ពុជាប្រចាំ ReCAAP ISC និងសម្តែងកិច្ចស្វាគមន៍យ៉ាងកក់ក្តៅចំពោះកិច្ចសហប្រតិបត្តិការជាបន្តបន្ទាប់របស់ ReCAAP ISC។ ជំនួបពិភាក្សានាឱកាសនេះ បានពិភាក្សាលើរបៀបវារៈមួយចំនួន ដើម្បីដាក់បញ្ចូលក្នុងកិច្ចប្រជុំក្រុមប្រឹក្សាភិបាលលើកទី១៩ របស់ ReCAAP ISC ដែលនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៤ ខែមីនា ឆ្នាំ២០២៥។ បន្ថែមពីនេះ ឯកឧត្តមអគ្គនាយក បានមានប្រសាសន៍ថា កម្ពុជានឹងបន្តពង្រឹងកិច្ចសហការជាមួយ ReCAAP ISC និងភាគីពាក់ព័ន្ធ និងសំណូមពរឱ្យបន្តពង្រឹងសមត្ថភាពមន្ត្រី តាមរយៈការផ្តល់វគ្គបណ្តុះបណ្តាល សិក្ខាសាលាចែករំលែកបទពិសោធន៍ និងបច្ចេកវិទ្យាថ្មីដើម្បីបន្តពង្រឹងសុវត្ថិភាព និងសន្តិសុខក្នុងវិស័យដឹកជញ្ជូនតាមផ្លូវសមុទ្រ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube