ពិធីផ្សព្វផ្សាយគោលនយោបាយ ភូមិ ឃុំ-សង្កាត់ មានសុវត្ថិភាព ទីស្តីការក្រសួង៖ នាព្រឹកថ្ងៃពុធ ទី១៩ ខែកុម្ភៈ ឆ្នាំ២០២៥ ឯកឧត្តម ខាន់ ម៉ាណេរ រដ្ឋលេខាធិការ ក្រសួងសាធារណការ និងដឹកជញ្ជូន និង ឯកឧត្តម អ៊ូច ភា រដ្ឋលេខាធិការ ក្រសួងមហាផ្ទៃ បានអញ្ជើញជាសហអធិបតីក្នុងពិធីផ្សព្វផ្សាយគោលនយោបាយ ភូមិ ឃុំ-សង្កាត់ មានសុវត្ថិភាព ដោយមានការអញ្ជើញចូលរួម ពីឯកឧត្តមថ្នាក់ដឹកនាំក្រសួង លោក-លោកស្រីជាថ្នាក់ដឹកនាំគ្រប់អគ្គនាយកដ្ឋានក្រោមឱវាទក្រសួង មន្ត្រីជំនាញ និងតំណាងមន្ទីរសាធារណការ និងដឹកជញ្ជូនទាំង២៥ រាជធានី-ខេត្ត សរុបចំនួន ២៥១រូប ក្នុងនោះស្រ្តីមានចំនួន ៦៦ រូបផងដែរ។ ពិធីនេះត្រូវបានរៀបចំឡើងក្នុងគោលបំណង ដើម្បីបញ្ជ្រាបការយល់ដឹងអំពីគោលជាតិឱ្យកាន់តែទូលំទូលាយដល់សាធារណជន និងកៀរគរការចូលរួមពីគ្រប់អង្គភាពពាក់ព័ន្ធទាំងអស់ក្នុងការអនុវត្តគោលនយោបាយនេះឱ្យមានប្រសិទ្ធភាព ស្របតាមឆន្ទៈ និងការប្ដេជ្ញាចិត្តរបស់រាជរដ្ឋាភិបាលកម្ពុជាក្នុងការលើកកម្ពស់សុខសុវត្ថិភាព សុខុមាលភាព សេវាសាធារណៈ ការទប់ស្កាត់នូវគ្រោះមហន្តរាយ និងទប់ស្កាត់ការឆ្លងរាលដាលនៃជំងឺកាចសាហាវផ្សេងៗផងដែរ។ ទន្ទឹមនឹងនោះផងដែរ ឯកឧត្តមរដ្ឋលេខាធិការ បានលើកឡើងពីសារៈសំខាន់នៃការចូលរួមអប់រំផ្សព្វផ្សាយអំពីគោលនយោបាយ ភូមិឃុំ-សង្កាត់ មានសុវត្ថិភាព ក៏ដូចជាការចូលរួមអនុវត្តឱ្យបានត្រឹមត្រូវទាំងអស់គ្នាឆ្លើយតបទៅនឹងគោលនយោបាយរបស់រាជរដ្ឋាភិបាលអណត្តិទី៧ ប្រកបដោយប្រសិទ្ធភាពខ្ពស់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube