ការចុះពិនិត្យវឌ្ឍនភាពការងារគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចនៅភូមិសាស្រ្តរាជធានីភ្នំពេញ រាជធានីភ្នំពេញ៖ នារសៀលថ្ងៃចន្ទ ទី១៧ ខែកុម្ភៈ ឆ្នាំ២០២៥ ឯកឧត្តម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស និងជាប្រធានក្រុមការងារបច្ចេកទេសត្រួតពិនិត្យ បានអញ្ជើញដឹកនាំក្រុមការងារបច្ចេកទេសចុះពិនិត្យទីតាំងគម្រោងផ្ទាល់ និងតាមដានវឌ្ឍនភាពការងារ ព្រមទាំងពិនិត្យដោះស្រាយនូវបញ្ហាប្រឈមមួយចំនួននៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិច នៅភូមិសាស្រ្តរាជធានីភ្នំពេញ ដែលអនុវត្តដោយក្រុមហ៊ុនសាងសង់ Phnom Penh Precast Plants Co., LTD និង T.C.M. Engineering Company LTD នឹងមានការអញ្ជើញចូលរួមពីឯកឧត្ដមអគ្គនាយកមន្ទីរពិសោធន៍សំណង់ និងសាធារណការ លោកប្រធាន-អនុប្រធាននាយកដ្ឋាន ក្រុមការងាររបស់ក្រុមហ៊ុនទទួលការសាងសង់ និងមន្រ្តីបច្ចេកទេសពាក់ព័ន្ធ។ ការចុះពិនិត្យនេះធ្វើឡើងចំនួន ៤ទីតាំង រួមមាន៖ ទី១ ចុះពិនិត្យការងារចាក់បេតុងខឿនចិញ្ចើមផ្លូវ នៅលើកំណាត់ផ្លូវជាតិលេខ៤ ទី២ ចុះពិនិត្យទីតាំងលូប្រអប់ដែលត្រូវស្ថាបនាឆ្លងកាត់ក្រោមផ្លូវរថភ្លើង ចំណុចផ្លូវប្រសព្វផ្លូវជាតិលេខ៤ និងផ្លូវរថភ្លើង ទី៣ ចុះពិនិត្យការងារស្ថាបនាប្រឡាយបេតុងតាមបណ្តោយផ្លូវរថភ្លើង និងទី៤ ចុះពិនិត្យទីតាំងអ័ក្សប្រឡាយ ស្ថិតតាមបណ្ដោយផ្លូវរថភ្លើងត្រង់ គ.ម២១+៨៥០ ដែលមានផលប៉ះពាល់ជាមួយដីបម្រុងទុករបស់ស្ថានីយរថភ្លើង។ សូមបញ្ជាក់ផងដែរថា គម្រោងនេះ បានបើកការដ្ឋាននៅថ្ងៃទី៥ ខែកក្កដា ឆ្នាំ២០២៤ កន្លងទៅ ហើយគ្រោងនឹងបញ្ចប់ការងារនៅខែកក្កដា ឆ្នាំ២០២៥ ខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube