កិច្ចប្រជុំក្រុមការងារសម្របសម្រួលផ្នែកពិធីការ ដើម្បីធានាប្រសិទ្ធភាពនៃដំណើរការប្រព្រឹត្តទៅរបស់សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ទីស្តីការក្រសួង៖ នាព្រឹកថ្ងៃទី២០ ខែមករា ឆ្នាំ២០២៥ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ និងជាប្រធានក្រុមការងារ បានអញ្ជើញដឹកនាំកិច្ចប្រជុំក្រុមការងារសម្របសម្រួលផ្នែកពិធីការ ដើម្បីធានាប្រសិទ្ធភាពនៃដំណើរការប្រព្រឹត្តទៅនៃសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ដោយមានការចូលរួមពី លោក លោកស្រីជាអនុប្រធាន និងសមាជិក សមាជិកាក្រុមការងារពាក់ព័ន្ធទាំងអស់។ គោលបំណងនៃកិច្ចប្រជុំក្រុមការងារនេះ ត្រូវបានរៀបចំឡើងដើម្បីពិនិត្យ និងសម្រេចលើការបែងចែកភារកិច្ច និងលំហូរការងារ ដែលបានកំណត់ជូនក្រុមការងារតាមផ្នែក និងជំនាញនីមួយៗសម្រាប់ពិធីសំខាន់ៗចំនួន ៣ រួមមានៈ ពិធីបើក និងដំណើរការសន្និបាត ពិធីជប់លៀងពិធីសន្និបាត និងពិធីបិទសន្និបាត ដើម្បីធានាថាពិធីសន្និបាតប្រចាំឆ្នាំរបស់ក្រសួងសាធារណការ និងដឹកជញ្ជូន អាចដំណើរការបានរលូន និងមានប្រសិទ្ធភាព។ សូមជម្រាបជូនថា ក្រសួងសាធារណការ និងដឹកជញ្ជូននឹងរៀបចំសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួង នៅថ្ងៃទី២២-២៣ ខែមករា ឆ្នាំ២០២៥ និងពិធីបិទសន្និបាតនឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅរសៀលថ្ងៃទី២៣ ខែមករា ឆ្នាំ២០២៥ ខាងមុខនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube