កិច្ចប្រជុំពិនិត្យ និងពិភាក្សាលើរបាយការណ៍បឋមជាមួយក្រុមហ៊ុនទីប្រឹក្សាបច្ចេកទេស Saman- Yooshin -KCIEng JV សម្រាប់គម្រោង Green Siem Reap Sewerage and Storm Drainage Project ទីស្ដីការក្រសួង៖ នាថ្ងៃព្រហស្បតិ៍ ទី៩ ខែមករា ឆ្នាំ២០២៥ ឯកឧត្ដម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំកិច្ចប្រជុំពិនិត្យ និងពិភាក្សាលើរបាយការណ៍បឋម (Inception Report) ជាមួយក្រុមហ៊ុនទីប្រឹក្សាបច្ចេកទេស Saman- Yooshin -KCIEng JV សម្រាប់គម្រោង Green Siem Reap Sewerage and Storm Drainage Project (EDCF KHM-29) ដោយមានការចូលរួមពីឯកឧត្ដមអនុរដ្ឋលេខាធិការ នាយករងគម្រោង តំណាងក្រសួងសេដ្ឋកិច្ច និងហិរញ្ញវត្ថុ និងសមាជិក-សមាជិកាគម្រោងផងដែរ។ កិច្ចប្រជុំនេះរៀបចំឡើងដើម្បីពិនិត្យ ពិភាក្សាពីលក្ខណៈវិនិច្ឆ័យដោយផ្ដោតលើរបាយការណ៍បឋម (Inception Report)ទាក់ទងនឹងវិសាលភាពការងារ ការរចនាប្លង់លម្អិត និងកាលវិភាគរចនាក្នុងការរៀបចំផែនការសម្រាប់ស្ទង់មតិ និងសហការពីគ្រប់ភាគីពាក់ព័ន្ធ ដើម្បីអាចអនុវត្តគម្រោងទៅបានប្រកបដោយប្រសិទ្ធភាព។ បន្ថែមពីនេះទៀត គម្រោងនេះនឹងពង្រីកសមត្ថភាពក្នុងការលើកកម្ពស់ការគ្រប់គ្រងអនាម័យ និងទឹកកខ្វក់នៅក្រុងសៀមរាប ដើម្បីកែលម្អការពារទឹកជំនន់ ការកកស្ទះលូ និងការប៉ះពាល់បរិស្ថាន ដោយនឹងអភិវឌ្ឍទៅលើប្រព័ន្ធលូ អាងប្រព្រឹត្តកម្មចម្រោះប្រព័ន្ធទឹកកខ្វក់ និងវិធានអនាម័យផ្សេងៗ សំដៅធ្វើយ៉ាងណាអាចគ្រប់គ្រងលើប្រតិបត្តិការ សម្រេចគោលនយោបាយ និងយុទ្ធសាស្ត្រនានាទាក់ទងនឹងការគ្រប់គ្រង អភិវឌ្ឍប្រព័ន្ធចម្រោះទឹកកខ្វក់ ឱ្យទទួលបាននូវសោភ័ណភាពទីក្រុងបៃតង និងភាពទាក់ទាញផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube