ព្រះសីហនុ៖ ក្រុមហ៊ុន Royal Railway នៅថ្ងៃទី២៧ ខែធ្នូ ឆ្នាំ២០២៤ បានសូមស្វាគមន៍ចំពោះការមកដល់ នៃរថភ្លើងដឹកទំនិញចំនួន៣៦គ្រឿងថែមទៀត ពីប្រទេសចិន។ រថភ្លើងដឹកទំនិញទាំងនេះ ត្រូវបានមកដល់និងលើកដាក់ចុះពីនាវាជោគជ័យ នៅយប់ថ្ងៃសុក្រ ទី២៧ ខែធ្នូ ឆ្នាំ២០២៤ ដើម្បីពង្រឹងបន្ថែមទៀត នូវសេវាកម្មដឹកជញ្ជូនតាមរថភ្លើង ដោយមានប្រសិទ្ធភាព ក្នុងប្រទេសកម្ពុជា។ រថភ្លើងដឹកទំនិញថ្មីទាំងនេះ ត្រូវបានផលិតដោយក្រុមហ៊ុនដ៏ល្បីឈ្មោះមួយ នៃប្រទេសចិន។ វាត្រូវបានបង្កើតឡើង ដោយសមត្ថភាពពិសេសជាច្រើន សម្រាប់ការផ្គត់ផ្គង់ការដឹកជញ្ជូន ដូចជាកុងតឺន័រ គ្រឿងចក្រ ឬសម្ភារសំណង់ ខ្សាច់ ឬទំនិញផ្សេងៗទៀតយ៉ាងជំនាញ។ រថភ្លើងដឹកទំនិញទាំងនេះ នឹងជាការឆ្លើយតបល្អប្រសើរ ទៅនឹងតម្រូវការដឹកជញ្ជូនតាមរយៈផ្លូវដែក ក្នុងប្រទេសកម្ពុជា។ មុនពេលចូលបម្រើសេវាកម្ម រថភ្លើងដឹកទំនិញទាំង៣៦គ្រឿង នឹងត្រូវបានធ្វើតេស្តប្រព័ន្ធហ្វ្រាំង និងប្រព័ន្ធសុវត្ថិភាពផ្សេងៗទៀត ដើម្បីធានាសុវត្ថិភាព និងប្រសិទ្ធភាពខ្ពស់ ក្នុងពេលបម្រើសេវាកម្មជូនដល់អតិថិជន រួចដាក់ឱ្យដំណើរសេវាកម្ម ចាប់ពីថ្ងៃទី២៨ ខែធ្នូ ឆ្នាំ២០២៤តទៅ។ សូមជម្រាបផងដែរថា រថភ្លើងដឹកទំនិញថ្មីចំនួន៤៤គ្រឿងទៀត នឹងគ្រោងមកដល់កម្ពុជា នៅដើមខែមករា ឆ្នាំ២០២៥នេះហើយ។ ចំណែកទូរបន្ថែមផ្សេងៗទៀត នឹងមកដល់ក្នុងប៉ុន្មានខែបន្ទាប់។ ការចូលមកនេះបង្ហាញពីការប្តេជ្ញាចិត្តរបស់ Royal Railway ដើម្បីឆ្លើយតបទៅនឹងតម្រូវការកាន់តែធំ លើដំណោះស្រាយដឹកជញ្ជូន សម្រាប់ឧស្សាហកម្មក្នុងប្រទេស។ ជាមួយគ្នានោះ ក្រុមហ៊ុន Royal Railway បានថ្លែងអំណរគុណចំពោះអតិថិជន និងដៃគូនានា សម្រាប់ការគាំទ្រដ៏ដ៏ល្អប្រសើរ នៅលើសេវាកម្មរបស់ក្រុមហ៊ុន ហើយក្រុមហ៊ុននៅតែប្តេជ្ញា ដើម្បីផ្តល់សេវាកម្ម ដែលមានគុណភាពល្អប្រសើរជាងមុន និងរួមចំណែកដល់ការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធនៅកម្ពុជា។ គួររំលឹកថាថ្មីៗនេះ គេសង្កេតឃើញប្រជាជនខ្មែរ និងទេសចរបរទេសកាន់តែច្រើន នាំគ្នាជិះរថភ្លើងទៅកាន់បណ្តាខេត្តនានាៗ ក្នុងប្រទសកម្ពុជា។ ការកើនឡើងនៃការចំនួនអ្នកដំណើរតាមរថភ្លើងនេះ ដោយសារពួកគាត់យល់ឃើញថា ការធ្វើដំណើរតាមរថភ្លើងមានភាពងាយស្រួល មានសុវត្ថិភាព ជួយកាត់បន្ថយការកកស្ទះចរាចរណ៍ រីឯសំបុត្រក៏មានតម្លៃទាប និងអាចគយគន់ទេសភាពដ៏ស្រស់ស្អាត នៅតាមដងផ្លូវថែមទៀតផង។ សូមជម្រាបថា ក្រុមហ៊ុន Royal Railway Cambodia របស់អ្នកឧកញ៉ា គិត ម៉េង កាលពីពេលថ្មីៗនេះបាននាំចូលទូរថភ្លើងជាច្រើនគ្រឿង ពីប្រទេសជប៉ុន ដែលទូររថភ្លើងប្រភេទថ្មីទំនើបនេះ ត្រូវបានបំពាក់ដោយម៉ាស៊ីនត្រជាក់ ជាមួយកៅអីអង្គុយងាយស្រួល និងផាសុខភាពផងដែរ។ តាមរយៈវត្តមានទូររថភ្លើងថ្មីនេះ ត្រូវបានអ្នកជំនាញក្នុងវិស័យដឹកជញ្ជូនអះអាងថា វាក៏នឹងធ្វើឱ្យការដឹកជញ្ជូនទំនិញចេញចូលកម្ពុជា មានសន្ទុះកាន់តែខ្លាំង ដោយសារការដឹកជញ្ជូនតាមរថភ្លើង មានតម្លៃសមរម្យ កាត់បន្ថយថ្លៃដើម ហើយអាចដឹកទំនិញបានច្រើន៕