ភ្នំពេញ៖ ក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន បានបង្ហាញសមិទ្ធផលនៃការកសាងផ្លូវក្រវាត់ព្រំដែន បានជាង១០០គីឡូម៉ែត្រហើយ ដោយក្នុងនោះ មានការឈូសឆាយផ្លូវទទឹង កសាងតួផ្លូវ និងចិតជញ្ជាំងភ្នំជាដើម។ក្រុមការងារកសាងហេដ្ឋារចនាសម្ព័ន្ធតាមព្រំដែន បានចេញសេចក្តីប្រកាសព័ត៌មានថា គិតត្រឹមថ្ងៃទី២៧ធ្នូនេះ ក្រុមការងារជំនាញ បានឈូសឆាយបើកមុខទទឹង៥ម៉ែត្រ សម្រាប់រកផ្លូវខ្សែដំបូង ដោយសម្រេចបានប្រវែង៥៨,៥គីឡូម៉ែត ក្នុងនោះ ខេត្តមណ្ឌលគិរី សម្រេចបានប្រវែង៤៩គីឡូម៉ែត្រ និងខេត្តរតនគិរី សម្រេចបានប្រវែង ៩,៥គីឡូម៉ែត្រ។ ចំណែកការឈូសផ្លូវទទឹង២០ម៉ែត្រ សម្រាប់រកអ័ក្សផ្លូវ លុបជ្រលងអូរ បន្ទាបចំណោតភ្នំ សម្រេចបានប្រវែង៣៦,៦០គីឡូម៉ែត្រ ក្នុងនោះ ខេត្តមណ្ឌលគិរី ប្រវែង ២៧,៩០គីឡូម៉ែត្រ និងខេត្តរតនគិរី ប្រវែង ៨,៧គីឡូម៉ែត្រ។ រីឯកសាងតួផ្លូវ និងចិតជញ្ជាំងភ្នំ សម្រេចបានប្រវែង២៥គីឡូម៉ែត្រ ដោយក្នុងនោះ ខេត្តមណ្ឌលគិរី សម្រេចបានប្រវែង ២២គីឡូម៉ែត្រ និងខេត្តរតនគិរី សម្រេចបាន៣គីឡូម៉ែត្រ។ បើតាមសេចក្តីប្រកាសព័ត៌មានដដែល ក្រុមការងារជំនាញ ក៏បានធ្វើប្រឡាយ ៣០,២០គីឡូម៉ែត្រ ដោយខេត្តមណ្ឌលគិរី សម្រេចបានប្រវែង ២២,៦០គីឡូម៉ែត្រ និងខេត្តរតនគិរី ប្រវែង៧,៦០គីឡូម៉ែត្រ។ ក្រៅពីនេះ ក្រុមការងារ ក៏បានក្រាលល្បាយកំទេចថ្មស្ថាពរ សម្រេចបានប្រវែង ១០,២០គីឡូម៉ែត្រ ក្នុងខេត្តមណ្ឌលគិរីទៀតផង។ ក្រៅពីនេះ ក៏មានកិច្ចការងារបោសសម្អាតមីនយុទ្ធភណ្ឌមិនទាន់ផ្ទុះ បាន១.៤៦២.៥០០ម៉ែត្រការ៉េ នៅខេត្តមណ្ឌលគិរី និងខេត្តរតនគិរីទៀតផង។ ជាមួយគ្នានេះក្រុមការងារជំនាញ ក៏បានបិទដំណើរការទាំងស្រុង នូវគណនីធនាគារផ្សេងៗ ដែលបានទទួលថវិកាមូល និងបានចាត់ក្រុមការងារចុះទៅការដ្ឋានសាងសង់។ ចំពោះថវិកាដែលទទួលបានតាមរយៈមូលនិធិកសាងផ្លូវក្រវាត់ព្រំដែននេះ ក្រុមការងារ អះអាងថា នឹងគ្រប់គ្រងថវិកានេះ ឱ្យបានត្រឹមត្រូវ ដើម្បីយកទៅប្រើប្រាស់ឱ្យមានប្រសិទ្ធភាព តម្លាភាព និងសន្សំសំចៃ ដែលជាការឆ្លើយតបនឹងសេចក្តីទុកចិត្តពីរដ្ឋាភិបាល និងប្រជាពលរដ្ឋ។ ពាក់ព័ន្ធនឹងព័ត៌មានលម្អិតនៃដំណើរការកសាងផ្លូវព្រំដែន នៅភូមិភាគឦសាននេះ សារព័ត៌មានឌីជីថលថ្មីៗ (ThmeyThmey) ពុំអាចសុំព័ត៌មានបន្ថែមពីលោក គីម ប៊ុនថាន អគ្គមេបញ្ជាការរងកងយោធពលខេមភូមិ្ទ ដែលជាអ្នកទទួលខុសត្រូវលើកិច្ចការងារកសាងផ្លូវព្រំដែនបានឡើយ។ យ៉ាងណាក៏ដោយ ក្នុងលិខិតរបស់ក្រុមការងារកសាងហេដ្ឋារចនាសម្ព័ន្ធតាមព្រំដែន បានអះអាងយ៉ាងដូច្នេះ៖ «ក្រុមការងារចំពោះកិច្ចនិងកងវិស្វកម្ម នៅតាមការដ្ឋានស្ថាបនាផ្លូវក្រវាត់ព្រំដែន ប្តេជ្ញាខិតខំបំពេញការងារ ដោយការទទួលខុសត្រូវខ្ពស់ដើម្បីសម្រេចឱ្យបាន តាមផែនការកសាងផ្លូវក្រវាត់ព្រំដែនជាប្រវត្តិសាស្ត្រ»។ ជុំវិញការកសាងផ្លូវព្រំដែននេះ រដ្ឋាភិបាល បានបង្កើត «មូលនិធិកសាងហេដ្ឋារចនាសម្ព័ន្ធតាមព្រំដែនដោយផ្តោតលើការ កសាងផ្លូវក្រវាត់ព្រំដែន» កាលពីថ្ងៃទី២២សីហា ។ រយៈពេលជាង១ខែប៉ុណ្ណោះ រដ្ឋាភិបាលទទួលបានថវិកាជិត២៧លានដុល្លារពីសប្បុរសជន សម្រាប់កសាងហេដ្ឋារចនាសម្ព័ន្ធតាមព្រំដែន មុននឹងសម្ដេច ហ៊ុន ម៉ាណែត ប្រកាសបិទគម្រោងមូលនិធិ នៅថ្ងៃទី៣១ តុលា៕