សិក្ខាសាលាស្តីពីប្រព័ន្ធទឹកស្អាត និងទឹកកខ្វក់ កម្ពុជា-ជប៉ុន លើកទី១៧ រាជធានីភ្នំពេញ៖ ឯកឧត្តម កឹម បូរី អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញចូលរួមសិក្ខាសាលាស្តីពីប្រព័ន្ធទឹកស្អាត និងទឹកកខ្វក់ កម្ពុជា-ជប៉ុន លើកទី១៧ដឹកនាំដោយ ឯកឧត្តម ស៊ឹម ស៊ីថា រដ្ឋលេខាធិកា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ សិក្ខាសាលាត្រូវបានរៀបចំឡើងរយៈពេល២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែធ្នូ ឆ្នាំ២០២៤ ដោយមានការចូលរួមពីឯកអគ្គរាជទូតជប៉ុនប្រចាំកម្ពុជា តំណាងជាន់ខ្ពស់ទៅភ្នាក់ងារសហប្រតិបត្តិការអន្តរជាតិជប៉ុន (JICA) ជំនួយការឯកឧត្តមអនុរដ្ឋមន្ត្រី ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន (MLIT) សមាគមធុរកិច្ចវិស័យទឹកក្រៅប្រទេស ទីក្រុងគីតាគ្យូសឹ ប្រទេសជប៉ុន និង ឯកឧត្តម លោកជំទាវ លោក-លោកស្រីតំណាងក្រសួង ស្ថាប័ន ថ្នាក់ជាតិ ថ្នាក់ក្រោមជាតិ សមាគម និងក្រុមហ៊ុននានាជាច្រើនរូប។ គោលបំណងនៃសិក្ខាសាលានាពេលនេះ គឺដើម្បីចែករំលែកបច្ចុប្បន្នភាព ស្ថានភាពការគ្រប់គ្រងប្រព័ន្ធទឹកស្អាត និងប្រព័ន្ធទឹកកខ្វក់ ព្រមទាំងបង្កើននូវកិច្ចសហប្រតិបត្តិការឱ្យកាន់តែល្អ ប្រសើររវាងប្រទេសទាំងពីរ កម្ពុជា-ជប៉ុន លើវិស័យទឹកស្អាត និងទឹកកខ្វក់ ដោយបានឆ្លុះបញ្ចាំងអំពីកិច្ចខិតខំប្រឹងប្រែង និងការចូលរួមចំណែកយ៉ាងសំខាន់ក្នុងការសម្រេចឱ្យបាននូវចក្ខុវិស័យរបស់រាជរដ្ឋាភិបាល ជាពិសេសការធ្វើឱ្យប្រសើរឡើងនូវសុខភាពសាធារណៈ និងការលើកកម្ពស់សោភ័ណភាពបរិស្ថាន និងទីក្រុងប្រកបដោយចីរភាព។ ក្នុងឱកាសនោះដែរ ឯកឧត្តមអគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក៏បានចូលរួមចែករំលែកនូវតួនាទី បេសកកម្ម និងទិសដៅរបស់អគ្គនាយកដ្ឋាន ក៏ដូចជាក្រសួង ក្នុងការអភិវឌ្ឍលើវិស័យទឹកស្អាត និងទឹកកខ្វក់ ដោយបានប្តេជ្ញាធ្វើការសហការជួយគាំទ្រនូវគម្រោងសាងសង់ កែលម្អប្រព័ន្ធលូទឹកកខ្វក់នេះដោយសុទិដ្ឋិនិយម ដើម្បីព្យាយាមប្រឹងប្រែងឈានទៅសម្រេចអោយបាន គោលដៅអភិវឌ្ឍប្រកបដោយចីរភាពឆ្នាំ២០៣០ (SDG by 2030) របស់អង្គការសហប្រជាជាតិ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube