ជំនួបសម្តែងការគួរសម និងពិភាក្សាការងារជាមួយគណៈប្រតិភូគណៈកម្មាធិការខ្សែច្រវាក់ត្រជាក់ នៃសហព័ន្ធភស្តុភារកម្មប្រទេសចិន ទីស្ដីការក្រសួង៖ នាថ្ងៃសុក្រ ទី២០ ខែធ្នូ ឆ្នាំ២០២៤ ឯកឧត្តម ហេង ណន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញទទួលជួបសម្តែងការគួរសម និងពិភាក្សាការងារជាមួយគណៈប្រតិភូគណៈកម្មាធិការខ្សែច្រវាក់ត្រជាក់នៃសហព័ន្ធភស្តុភារកម្មប្រទេសចិន(Cold Chain Logistics Committee of China Federation of Logistics and Purchasing) ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញមកពីអគ្គនាយកដ្ឋានភស្តុភារកម្ម សមាគម និងក្រុមហ៊ុនឯកជនក្នុងវិស័យឡូជីស្ទីកជាច្រើនរូបផងដែរ។ ជំនួបពិភាក្សានេះ ធ្វើឡើងក្នុងគោលបំណងដើម្បីសិក្សាស្វែងយល់ពីឱកាសវិនិយោគ លើវិស័យហេដ្ឋារចនាសម្ព័ន្ធដឹកជញ្ជូន និងឡូជីស្ទីក នៅកម្ពុជាជាពិសេសខ្សែច្រវាក់ត្រជាក់ ។ បន្ថែមពីលើនេះ ឯកឧត្តមរដ្ឋលេខាធិការ បានលើកឡើងពីតួនាទី និងសមិទ្ធផលសំខាន់ៗដែលក្រសួងសម្រេចបាន នាពេលកន្លងមក និងវឌ្ឍនភាពនៃការអនុវត្តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ ដែលរាជរដ្ឋាភិបាលបានដាក់ឱ្យប្រើប្រាស់កាលពីថ្ងៃទី២ ខែសីហា ឆ្នាំ២០២៣ កន្លងមក។ គួរបញ្ជាក់ថាផែនការមេនេះ រួមមានគម្រោងអភិវឌ្ឍន៍ហេដ្ឋារចនាសម្ព័ន្ធទាំងផ្នែករឹង និងទុន សរុបចំនួន ១៧៤គម្រោង និងតម្រូវការទុនវិនិយោគប្រមាណ ៣៦,៦ពាន់លានដុល្លារ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube