កិច្ចប្រជុំពិភាក្សារវាងក្រុមការងារបច្ចេកទេសនៃអគ្គនាយកដ្ឋានបច្ចេកទេស ជាមួយតំណាងក្រុមហ៊ុនជប៉ុន TOA។ ទីស្ដីការក្រសួង៖ នាព្រឹកថ្ងៃពុធ ទី១១ ខែធ្នូ ឆ្នាំ២០២៤ ឯកឧត្ដម ហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស បានអញ្ជើញដឹកនាំកិច្ចប្រជុំជាមួយតំណាងក្រុមហ៊ុនជប៉ុន TOA ក្នុងការនាំយកមកនូវសម្ភារៈ និងបច្ចេកទេសថ្មីៗសម្រាប់ការជួសជុល និងថែទាំផ្លូវថ្នល់ ដែលមានការចូលរួមពីលោកប្រធាន និងអនុប្រធាននាយកដ្ឋាន ព្រមទាំងមន្ត្រីបច្ចេកទេសពាក់ព័ន្ធ។ កិច្ចប្រជុំពិភាក្សានេះ រៀបចំឡើងក្នុងគោលបំណងស្វែងយល់អំពីសម្ភារៈ និងបច្ចេកទេសថ្មីរបស់ក្រុមហ៊ុន TOA នៃប្រទេសជប៉ុន លើការងារជួសជុល និងថែទាំផ្លូវថ្នល់ ដោយក្នុងនោះមានការបង្ហាញពីសម្ភារៈថ្នាំលាបលើ Asphalt Concrete (AC) និងកម្រាលបេតុង សម្ភារៈសម្រាប់ជួសជុលស្នាមប្រេះលើកៅស៊ូ AC ព្រមទាំងពិភាក្សាលើបញ្ហាប្រឈមមួយចំនួនដែលតែងតែកើតមានឡើងលើផ្លូវដែលមានកម្រាល AC និងកម្រាលបេតុង។ ក្នុងជំនួបនៃកិច្ចប្រជុំពិភាក្សានេះ ឯកឧត្តមអគ្គនាយកបច្ចេកទេស និងតំណាងក្រុមហ៊ុនជប៉ុន TOA បានឯកភាពគ្នា ដើម្បីស្វែងរកទីតាំងសម្រាប់ធ្វើការពិសោធន៍ជាក់ស្ដែងនូវសម្ភារៈដែលយកមកដាក់បង្ហាញ និងការស្វែងយល់ពីបច្ចេកទេសក្នុងការអនុវត្តការងារផងដែរ។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube