វគ្គបណ្ដុះបណ្ដាល ស្ដីពីការប្រើប្រាស់ DGPS -RTK ដើម្បីកំណត់ទីតាំង និងនិយាមកាព្រំប្រទល់ដីជាក់ស្ដែង នៃគម្រោងផ្លូវនាវាចរណ៍ព្រែកជីកហ្វូណនតេជោ ទីស្ដីការក្រសួង៖ នាថ្ងៃព្រហស្បត្តិ៍ ទី៥ ខែធ្នូ ឆ្នាំ២០២៤ ឯកឧត្ដម អៀង វ៉េងស៊ុន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីភាពបើកវគ្គបណ្ដុះបណ្ដាល ស្ដីពីការប្រើប្រាស់ DGPS -RTK ដើម្បីកំណត់ទីតាំង និងនិយាមកាព្រំប្រទល់ដីជាក់ស្ដែង នៃគម្រោងផ្លូវនាវាចរណ៍ព្រែកជីកហ្វូណនតេជោ ដោយមានការអញ្ជើញចូលរួមពីថ្នាក់ដឹកនាំក្រសួង តំណាងក្រសួង ស្ថាប័ន និងមន្ត្រីជំនាញពាក់ព័ន្ធ។ វគ្គបណ្ដុះបណ្ដាលនេះប្រព្រឹត្តទៅរយៈពេលពីរថ្ងៃ ចាប់ពីថ្ងៃទី៥ ខែធ្នូ ដល់ថ្ងៃទី៦ ខែធ្នូ ឆ្នាំ២០២៤ ក្នុងគោលបំណងដើម្បីចែករំលែកចំណេះដឹងទាក់ទងទៅនឹងការប្រើប្រាស់ឧបករណ៍ DGPS -RTK ជូនដល់ក្រុមការងារ ដែលជាអ្នកចុះកំណត់ទីតាំង និងនិយាមកាជាក់ស្ដែង ដើម្បីជាមូលដ្ឋានក្នុងការរៀបចំដោះស្រាយផលប៉ះពាល់ជូនប្រជាពលរដ្ឋដែលរស់នៅអមសងខាងព្រែកជីកនេះ ដើម្បីឆ្ពោះទៅកាន់ការអនុវត្ត នៃគម្រោងផ្លូវនាវាចរណ៍ព្រែកជីកហ្វូណនតេជោផងដែរ។ ថ្លែងនាឱកាសនោះ ឯកឧត្ដមរដ្ឋលេខាធិការ គណៈធិបតី បានគូសបញ្ជាក់ថា៖ គម្រោងផ្លូវនាវាចរណ៍ព្រែកជីកហ្វូណនតេជោនេះមានប្រវែង ១៨០គីឡូម៉ែត្រ (ទទឹងមុខកាត់ផ្នែកខាងលើប្រវែង ១០០ម៉ែត្រ ផ្នែកខាងក្រោម ៨០ម៉ែត្រ) តភ្ជាប់ពីព្រែកតាកែវ នៃទន្លេមេគង្គ រួចចូលតាមបណ្តាព្រែក នៃទន្លេបាសាក់ ស្រុកកោះធំ និងបន្តរហូតដល់ សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ខេត្តកណ្តាល តាកែវ កំពត និងកែប៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube