កិច្ចប្រជុំគណៈកម្មាធិការសម្របសម្រួលរួម "Joint Coordinating Committee លើកទី១ នៃគម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធទឹកកខ្វក់របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ជំហានទី២ រាជធានីភ្នំពេញ៖ នាព្រឹកថ្ងៃពុធ ទី០៤ ខែធ្នូ ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីកិច្ចប្រជុំគណៈកម្មាធិការសម្របសម្រួលរួម "Joint Coordinating Committee លើកទី១ នៃគម្រោងអភិវឌ្ឍន៍សមត្ថភាពលើការគ្រប់គ្រងប្រព័ន្ធទឹកកខ្វក់ របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ជំហានទី២ ក្រោមកិច្ចសហប្រតិបត្តិការបច្ចេកទេសរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA)។ កិច្ចប្រជុំនេះ មានការអញ្ជើញចូលរួមពី លោក Kuribayashi Takanori លេខាទីមួយ នៃស្ថានទូតជប៉ុនប្រចាំកម្ពុជា លោកស្រី MIURA Yoshiko នាយិការង នៃការិយាល័យ និងក្រុមការងារគម្រោងរបស់ JICA ប្រចាំប្រទេសកម្ពុជា អភិបាលរង នៃគណៈអភិបាលរាជធានីភ្នំពេញ ឯកឧត្តមអនុរដ្ឋលេខាធិការ ឯកឧត្តមអគ្គនាយក និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ និងសមាជិកគណៈកម្មាធិការដឹកនាំដែលមកពីបណ្តាក្រសួង-ស្ថាប័ន និងមន្ទីរពាក់ព័ន្ធ។ គោលបំណងនៃកិច្ចប្រជុំនេះ គឺដើម្បីប្រមូលនូវមូលដ្ឋានគ្រឹះសំខាន់ៗសម្រាប់អភិវឌ្ឍសមត្ថភាពលើការគ្រប់គ្រងប្រព័ន្ធទឹកកខ្វក់ របស់រដ្ឋបាលរាជធានីភ្នំពេញ និងក្រសួងសាធារណការ និងដឹកជញ្ជូន ដោយផ្តោតលើការរៀបចំផែនការ សេវាគ្រប់គ្រងប្រព័ន្ធទឹកកខ្វក់ និងការបង្កើតក្របខ័ណ្ឌអភិវឌ្ឍន៍ធនធានមនុស្ស សម្រាប់ស្ថានីយប្រព្រឹត្តិកម្មទឹកកខ្វក់ ដើម្បីឈានទៅរកការគ្រប់គ្រងប្រព័ន្ធទឹកកខ្វក់ប្រកបដោយប្រសិទ្ធភាព និងនិរន្តរភាព ឱ្យស្របតាមយុទ្ធសាស្ត្របញ្ចកោណនៅត្រង់ចំណុចទី៣ នៃមុំទី៤ ក្នុងបញ្ចកោណទី៤ ដែលកំណត់អំពី “ការរៀបចំផែនការមេអភិវឌ្ឍហេដ្ឋារចនាសម្ព័ន្ធទីក្រុង និងទីប្រជុំជនសំខាន់ៗ ប្រកបដោយភាពធន់ និងសោភ័ណភាព ការជំរុញការប្រើប្រាស់សេវាដឹកជញ្ជូនសាធារណៈក្នុងទីក្រុង ការគ្រប់គ្រង ទុកដាក់ និងកែច្នៃសំរាម ការពង្រីកបណ្តាញទឹកស្អាត ប្រព័ន្ធលូរំដោះទឹកភ្លៀង ប្រព័ន្ធចម្រោះ និងប្រព្រឹត្តកម្មទឹកកខ្វក់” ផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube