រដ្ឋបាលសង្កាត់ស្ពានថ្ម បានចុះត្រួតពិនិត្យ និងស្ថាបនាផ្លូវបេតុងថ្មីមួយខ្សែ ស្ថិតក្នុងភូមិម៉ឺន្ត្រា សង្កាត់ស្ពានថ្ម ខណ្ឌដង្កោ ដែលមានប្រវែង ៣៧៣ម៉ែត្រ ទទឹង ៥ម៉ែត្រ កម្រាស់ ១.៥ តឹកកន្លះ ជូនពលរដ្ឋដែលកន្លងមកពិបាកធ្វើដំណើរ។លោក ហង្ស ជុំ ចៅសង្កាត់ស្ពានថ្ម បានប្រាប់អោយដឹងថា រដ្ឋបាលសង្កាត់បានស្ថាបនាផ្លូវបេតុងថ្មីមួយខ្សែនេះជូនប្រជាពលរដ្ឋដែលរស់នៅក្នុងមូលដ្ឋានសង្កាត់ ដើម្បីដោះស្រាយផលលំបាកលើការធ្វើដំណើរឆ្លងកាត់ទៅមក ដែលកន្លងមកពលរដ្ឋបានសំណូមពរទៅកាន់អាជ្ញាធរអោយជួយរកដំណោះស្រាយលើផ្លូវបេតុងនេះ។លោកចៅសង្កាត់ស្ពានថ្ម បានបញ្ជាក់បន្ថែមថា ផ្លូវបេតុងដែលកំពុងតែស្ថាបនានេះ គឺជាថវិកាមូលនិធិសង្កាត់ឆ្នាំ២០២៤ ដោយឡែក គ្រប់ផ្លូវដែលមិនទាន់បានជួសជុល ស្ថាបនានោះ គឺក្រុមប្រឹក្សាសង្កាត់បានដាក់បញ្ចូលក្នុងផែនការអភិវឌ្ឍ៥ឆ្នាំរបស់ក្រុមប្រឹក្សាសង្កាត់ ដែលនឹងធ្វើការជួសជុលស្ថាបនា ជាជំហ៊ានៗ ទៅតាមកញ្ចប់ថវិកាផ្នែកអភិវឌ្ឍន៍ស្របទៅតាមកម្មវិធីវិនិយោគប្រចាំឆ្នាំ ដែលបានកំណត់ដោយក្រុមប្រឹក្សាសង្កាត់។លោកស្រី តី សុធារី បានលើកឡើងថា ក្នុងនាមជាប្រជាពលរដ្ឋមានការសាទរជាខ្លាំង ក្រោយមានការយកចិត្តទុកដាក់ពីអាជ្ញាធរក្នុងមូលដ្ឋាន បានចុះមកត្រួតពិនិត្យ និងស្ថាបនាផ្លូវបេតុងខាងលើនេះ ដែលកន្លងទៅផ្លូវនេះពិបាកធ្វើដំណើរតែម្តង ដោយសារតែមានដីហ៊ុយ ជង្ហុក និងថ្មីច្រើន ជាហេតុធ្វើអោយពលរដ្ឋពិបាកធ្វើដំណើរ៕