កិច្ចប្រជុំ ស្ដីពីវឌ្ឍនភាពគម្រោងវិនិយោគបន្ទាន់ លើហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិច នៅភូមិសាស្ត្ររាជធានីភ្នំពេញ ឆ្នាំ២០២៤ ទីស្ដីការក្រសួង៖ នាព្រឹកថ្ងៃព្រហស្បតិ៍ ទី០៧ ខែវិច្ឆិកា ឆ្នាំ២០២៤ ឯកឧត្តម ហ៊ាង វុត្ថា អគ្គនាយកបច្ចេកទេស និងជាប្រធានក្រុមការងារបច្ចេកទេស ឯកឧត្តម ចៅសុភៈភិបាល អគ្គនាយកប្រព័ន្ធចម្រោះទឹកកខ្វក់ និងជានាយកគម្រោង បានអញ្ជើញជាសហប្រធានដឹកនាំកិច្ចប្រជុំ ស្ដីពីវឌ្ឍនភាពគម្រោងវិនិយោគបន្ទាន់ លើហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិច នៅភូមិសាស្ត្ររាជធានីភ្នំពេញ ឆ្នាំ២០២៤ ដោយមានការចូលរួមពី លោកប្រធាននាយកដ្ឋានផ្លូវដែក សមាសភាពក្រុមការងារបច្ចេកទេស និងមន្ត្រីបច្ចេកទេសពាក់ព័ន្ធ ព្រមទាំងក្រុមការងារបច្ចេកទេសនៃក្រុមហ៊ុនទទួលអនុវត្តការងារសាងសង់ Phnom Penh Precast Plants Co.,LTD និង T.C.M. Engineering Company LTD។ កិច្ចប្រជុំនេះ រៀបចំឡើងដើម្បីពិភាក្សាទៅតាមរបៀបវារៈសំខាន់ៗចំនួន៤ រួមមាន៖ ១.) វឌ្ឍនភាពនៃការអនុវត្តគម្រោង ២.)ផែនការនៃការអនុវត្តការងារក្នុងខែវិច្ឆិកា ៣.) បញ្ហាប្រឈម និងដំណោះស្រាយ (បញ្ហាប្រឈមតាមបណ្ដោយផ្លូវរថភ្លើង រួមមានការផ្លាស់ប្តូរទីតាំងបង្គោលភ្លើង និងការសាងសង់ប្រព័ន្ធលូឆ្លងកាត់ក្រោមផ្លូវរថភ្លើង) និង ៤.) ការងារផ្សេងៗ (រួមមាន៖ ការកំណត់សំណង់ទ្វារទឹក គំរូខឿនចិញ្ចើមផ្លូវ និងការពង្រឹងសុវត្ថិភាពការដ្ឋាន)។ ចំពោះវឌ្ឍភាពការងារជារួមនៃគម្រោង សម្រេចបានប្រមាណ ២២% នៃទំហំការងារសរុប៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube